Андижондаги боғчада 4 ёшли бола вафот этди
Уйқуга ётиб қайта уйғонмаган боланинг ўлим сабаби номаълум.
Мактабгача таълим вазирлиги Ахборот хизмати хабар беришича, кеча соат 14-00дан 15-00га қадар бўлган оралиқдаги вақтда Андижон вилояти, Олтинкўл туманидаги 31-сонли давлат мактабгача таълим ташкилотида тарбияланаётган 4 ёшли Лутфуллаев Хушнудбек мактабгача таълим ташкилотининг кун тартибидаги уйқу вақтида ухлаётганда оламдан ўтган.
Ташкилот ҳамширасининг сўзларига кўра, эрталабки қабул жараёнида тарбияланувчи Лутфуллаев Хушнудбекда ҳеч қандай касаллик аломатлари кузатилмаган.
Кун тартибидаги уйқу вақтида ҳар доимгидек болалар уйқуга ётқизилган. Тарбиячи томонидан тарбияланувчиларни уйқудан уйғотилганда бола ўрнидан турмаган. Шундан сўнг МТТ ходимлари дарҳол тез ёрдамга мурожаат қилинган. Тиббиёт ходимлари томонидан тарбияланувчи тиббий назоратдан ўтказилганда 4 ёшли Хушнудбекнинг уйқу вақтида оламдан ўтганлиги маълум бўлган.
Ҳозирги воқеа юзасидан ҳуқуқ-тартибот органлари томонидан суриштирув, экспертиза ишлари олиб борилмоқда.
