“Милан”нинг трансферлари учун 300 миллион евро берилади
Клубни Баҳрайннинг энг йирик инвестиция фонди сотиб олмоқда.
Баҳрайннинг энг йирик инвестиция фонди – “Investcorp” “Eliott Management” билан Италиянинг “Милан” клубини сотиб олиш бўйича музокараларни давом эттирмоқда. Томонлар келишувни ой охиригача якунлашга умид қилмоқда. Бу ҳақда “Football Italia” нашри хабар берди.
2022/2023 йилги мавсум учун “Investcorp” “Милан”га трансфер бозорини кучайтиришга катта миқдорда сармоя киритишни режалаштирмоқда. Компания кейинги икки трансфер ойнаси учун 300 миллион евро ажратишга тайёр.
Ёзда “Милан” “Ливерпул” ҳужумчиси Дивок Оригини сотиб олиши мумкин. Олдинроқ ОАВ бу борада томонлар келишувга эришганлиги ҳақида хабар берган эди. Жамоада футболчидан қанот ўйинчиси сифатида фойдаланиш режалаштирилган.
Бундан ташқари “Милан” ҳужумини кучайтириш учун “Сассуоло”дан Жанлука Скамакка ва “Аякс”дан Себастян Аллер каби ҳужумчиларни ўз сафига қўшиб олмоқчи.
Аввалроқ, Дибалага ўринбосар топилгани ҳақида хабар берилганди.
Жамшидбек Амиров
