Лицензиясиз нодавлат ОТМлар берган дипломлар «ўтмайди»
Бу “Таълим тўғрисида”ги қонуннинг 29-моддасида келтириб ўтилган.
Юртимизда фаолият кўрсатаётган нодавлат олий таълим ташкилотлари, уларнинг ҳаққонийлиги, яъни олий таълим хизматларини кўрсатиш учун лицензияси мавжудлигини текширишда эътибор қаратиш лозим бўлган жиҳатлари айтилди.Бу ҳақда Таълим сифатини назорат қилиш давлат инспекцияси ахборот хизмати раҳбари Шавкат Хўжақулов маълум қилди.
Мутахассис сўзларига кўра, 2018 – 2020 йиллар оралиғида лицензияга эга бўлган нодавлат олий таълим ташкилотлари сони 13 тани ташкил этган бўлса, амалга оширилган ислоҳотлар натижасида биргина 2021 йилнинг ўзида 21 та нодавлат олий таълим ташкилоти фаолияти лицензияланди.
Ушбу нодавлат олий таълим ташкилотлари томонидан бериладиган дипломлар Ўзбекистондаги бошқа олий таълим муассасалари дипломлари қаторида тан олинади.
Афсуски, айрим ҳолатларда нодавлат олий таълим хизматларини кўрсатиш учун лицензияга эга бўлмаган ёки фақатгина ўқув маркази сифатида фаолият олиб бориш ҳуқуқига эга бўлган баъзи ташкилотлар фуқароларимиз ўртасида ўзини хусусий олийгоҳ сифатида таништириб, абитуриентларни ўқишга жалб қилишга уринишлар кузатилмоқда.
