“Барселона” ҳамон муаммолар қуршовида

 

28 май куни «Реал Мадрид» клуби Европа чемпионлар лигасида навбатдаги ғалабасини қўлга киритди. Шу тариқа қироллик клуби ўз тарихида 14-бор мусобақа чемпионига айланди. Бундан ташқари, мадридликлар бу мавсумда Испания чемпионатида ҳам биринчи ўрин соҳибига айланди.

 

«Реал Мадрид»нинг азалий рақиби «Барселона» эса чемпионлар лигасида кўнгилдагидек иштирок этолмади. Шунингдек, мамлакат чемпионатида кумуш медални қўлга киритишди. Муҳим жиҳати шундаки, ушбу жамоаларнинг иккинчи даврадаги ўйинида каталонияликлар 4:0 ҳисобида йирик ғалабага эришганди.

 

Ҳозирда «Барселона» жамоасида катта молиявий ислоҳотлар амалга оширилмоқда. Мана шу фактор клубнинг ўйинларига ҳам ўзининг таъсирини ўтказмай қолгани йўқ.

 

«Барса»нинг молиявий аҳволи қандай?

 

Каталония клубининг молиявий ҳолати ҳалигача оғирлиги айтилмоқда. Яқинда клуб президенти Жоан Лапорта «Барселона» жуда қийин аҳволда эканини тан олди. У бунинг сабабини аввалги раҳбариятнинг масъулиятсизлиги ва қобилиятсизлиги деб айтди:

 

«Дунёнинг энг яхши клубларидан бирини бошқариш, барчаси мукаммал бўлади дегани эмас, ахир.  Баъзида жамоа қийинчиликларга ҳам дуч келиши мумкин. Аммо ажойиб клубимизнинг олдинги раҳбарлари унинг истиқболи ҳақида ўйламаган. Ҳозирда биз улардан мерос бўлиб қолган тартибсизликларни йўлга қўймоқдамиз».

 

Аслида, Лапорта «Барса»нинг қарзини ҳозиргача унчалик қисқартиришга улгургани йўқ. Клубнинг умумий қарзи 1,3 миллиард евро атрофида экани айтилмоқда. Хосеп Бартомеу бу қарзни қоплаш йўлларини изламаган ва бу янада ортиб бораверган. Лапорта «Барса»нинг молиявий ҳолатини тиклаш бўйича аниқ режаси борлигини маълум қилди. Хави билан тузилган узоқ муддатли шартнома мана шу режалар ичига кириб кетади. Лапорта бу идеал ғоя эканлигини айтди. Чунки у клуб фалсафасини тўлиқ тушунади ва камчиликни ҳал этиш борасида жонбозлик кўрсата олади. Шунингдек, Хави ёш футболчилар орасида яхшигина обрўга ҳам эга.

 

Ҳомийнинг ўзгариши

 

«Барселона» ҳомийси «Rakuten» билан шартнома тугагани боис, у билан ҳамкорликни тўхтатди. Шундан сўнг «Барса»га Ҳиндистон, Бирлашган Араб Амирликлари компанияларидан бир қатор таклифлар келиб тушди. Аммо «Барселона» «Spotify» компаниясини танлади.

 

Швециянинг стриминг хизмати билан тузилган шартномага кўра, «Барса» йилига 75 миллион евро пул ишлаб олади. Бунинг эвазига клуб титул ҳомийси ўрнига компания логотипини жойлаштиради ва стадион номини «Spotify Camp Nou» га ўзгартиради.

 

Футболчиларнинг маошидаги чегара

 

Яқинда «АS» нашри Ла Лига клубларининг маош чегараси ҳақида маълумотни эълон қилди. Кутилганидек, «Реал Мадрид» ушбу рейтингнинг энг юқори поғонасига жойлашди. Клубнинг маош учун сарфланадиган пули 739 миллион евро экани маълум бўлди. «Барселона»да эса бу кўрсаткич 144 миллион евролиги айтилди. Охирги ўринни «Леванте» клуби 33 миллион евро билан банд этди.

 

Каталония клуби катта қарзлар туфайли ушбу рўйхатнинг қуйи поғоналаридан жой олди. Агар бир йил олдин «Барса»нинг аксарият ўйинчилари маошларини камайтиришга қарор қилмаганларида, клубнинг бу кўрсаткичи бундан ҳам паст бўлиши мумкин эди. Жамоа олдида қарзлардан қутилиш учун яна бир вариант бор. Бу инвесторларни излаш ва ўйинчиларни сотиш билан боғлиқ.

 

Месси ҳақида миш-мишлар юрибди

 

Франциянинг «ПСЖ» клубига ўтган «Барса»нинг собиқ футболчиси Лионел Месси яна Каталонияга қайтиши ҳақида миш-мишлар тарқалди. Бунга Париж клубининг Чемпионлар лигасини тарк этгани сабаб қилинган. Мессининг ўзи эса ҳеч қаерга кетмаслиги ва Францияда қолишини маълум қилди. Ҳужумчининг Париж клуби билан шартномаси 2023 йилнинг июнь ойига қадар мўлжалланган. Агар «Барса» уни сотиб оладиган бўлса, тахминий харажат сарф этиши мумкин бўлади.  Ноябрь ойида «ПСЖ» президенти Мессини сотса, унинг нархи 200 миллион евродан кам бўлмаслигини айтди. 

 

Трансфермаркт эса ҳужумчини 60 миллион еврога баҳолаган. Ҳозирда Месси ҳар мавсум учун Париж жамоасидан 30 миллион евро маош олмоқда. Каталонияликлар футболчи учун бу миқдордаги пулни тўлаш имкониятига эга эмас.

 

«Барселона» қайси футболчилар билан шартнома имзолаши мумкин?

 

Футболчиларни сотиб олиш клубнинг трансфер буджети ва иш ҳақи чегарасига боғлиқ. Ёзда «Барса» янги молиявий имкониятларни жорий қилиб (қўшимча инвесторлар туфайли) қарзларнинг маълум миқдорини қоплашни режалаштирган.

Яқинда клуб Эрлинг Ҳоланд билан шартнома тузиши ҳақида хабарлар пайдо бўлганди. Бироқ у «Манчестер Сити» футболчисига айланиб улгурди. Бундан ташқари, Каталонияликлар «Бавария» ҳужумчиси Роберт Левандовскини сотиб олиш бўйича ҳам музокара ўтказмоқда. Бироқ футболчининг жамоага ўтиши ҳали аниқ эмас. Буни вақт кўрсатади. Клуб президенти ундан ҳали ҳам умидини узмаган чоғи, бундан бошқа биронта трансфер борасида гапиргани йўқ. «Барса» ҳозирда ўз академиясидан чиққан ёш футболчиларга ишонмоқда. Қолаверса, Лапортанинг ўзи ҳам бу борада шундай деди:

 

«Биз ёш футболчиларимизга ишонамиз. Бир-икки йил ичида вазият яхшиланса, дунёнинг энг яхши футболчиларини ҳам олиб келамиз. Кейин улар шу вақт ичида жаҳон юлдузлари даражасига кўтариладиган академиямизнинг яхши футболчилари билан ўйнайди. Шундай сўнг, «Барселона» яна дунёнинг энг яхши жамоаси бўлади».

 

«Барселона» муҳлислари клубнинг  айни пайтдаги муаммолардан қутулиб, яна чемпионлик пойгаларига қайтишига ишонади.

 

Жамшидбек Амиров