“Ливерпул” 36 ёшли Милнер билан шартномани узайтирди
Келишув кейинги йил якунига қадар тузилган.
36 ёшли инглиз ярим ҳимоячиси Жеймс Милнер «Ливерпул» билан шартномасини узайтирди. Томонлар ўртасидаги янги келишув 2022/2023 йилги мавсум охиригача мўлжалланган. Бу ҳақда «мерсисайдликлар» матбуот хизмати хабар берди.
Милнер аввалроқ узоқ профессионал фаолияти ва Буюк Британияда ёшларни соғлом турмуш тарзига тарғиб қилиш мақсадида хайрия жамғармасини ташкил этгани учун мукофотланган.
Футболчи «Ливерпул» клубига 2015 йилда текин трансфер эвазига келиб қўшилган эди. Ўшандан бери у жамоа сафида 289 та ўйинда майдонга тушган. 2021/2022 йилги мавсумда у барча мусобақаларда 35 та учрашувда қатнашиб, 3 та голли узатмани амалга оширди.
