Гвардиола Зинченкодан қутулмоқчи
Украиналик футболчида олтита вариант бор.
“Манчестер Сити” футболчиси Александр Зинченко ҳозирда Украина терма жамоасининг асосий юлдузларидан бири. Ҳимоячи олти йилдан бери “шаҳарликлар” таркибида тўп суриб келмоқда. У бу вақт мобайнида жамоа билан 10 та совринни қўлга киритди. Сўнгги пайтларда Пеп Гвардиола бошқараётган инглиз клубидан Александрнинг кетиши ҳақида кўплаб гаплар тарқалмоқда. Футболчининг карьера имкониятлари жуда кўп. Унга ҳозирнинг ўзида бир қатор жамоалар қизиқиш билдирмоқда.
У Англияни тарк этмоқчи эмас
Жароҳатлар, коронавирус касаллиги ва мавсум бошини ўтказиб юборганига қарамай, украиналик футболчи “Манчестер Сити” сафида мавсум давомида барча мусобақаларда 28 та ўйинда майдонга тушди. Масалан, Чемпионлар лигасида у 11 ўйиннинг бештасида қатнашди ва “Реал”га қарши 210 дақиқанинг 138 дақиқасини майдонда ўтказди. Англия чемпионатида эса чап қанот ҳимоячиси сифатида кўпроқ вақтини захирада ўтказди. Барибир ҳимоячи бўлишига қарамай чемпионат давомида 15 ўйинда тўртта голли узатмани амалга оширди.
Биринчилардан бўлиб «ЭСПН» нашри Зинченконинг «Манчестер Сити»ни тарк этиши мумкинлиги ҳақида ёзди. Май ойи ўрталарида ушбу нашр бир қанча клублар 25 ёшли украиналик футболчини ўз сафига қўшиб олмоқчи экани ҳақида маълум қилган. Бироқ жамоалар номи ошкор қилинмаган. Маълумотларига кўра, «шаҳарликлар» аллақачон украиналикнинг ўрнига ҳимоячи қидиришни бошлашган.
“Арсенал” ва “Вест Хем”
Ушбу хабарлардан сўнг 10 кун ўтиб Зинченкога биринчи давогар “Арсенал” эканлиги маълум бўлди. Лондонликлар бош мураббийи Мишел Артета украиналик футболчига қизиқаётгани айтилди. Маълум бўлишича 40 ёшли мутахассис ярим ҳимояда Александрдан ўзининг севимли позициясида фойдаланишни режалаштирмоқда. “Манчестер Сити”да эса Зинченко асосан чап қанот ҳимоясида тўп сурган. Қайд этилишича, бунгача «шаҳарликлар» мураббийлар штабида ишлаган Артета украиналик билан жуда яхши муносабатда. “Арсенал” бош мураббийи Зинченкога Лондон клубига ўтган тақдирда ярим ҳимоячи ўрнини ваъда қилган.
“Эвертон” ва “Нюкасл”
Бундан ташқари "Манчестер Сити" Александрнинг хизматларини «Эвертон» ва “Нюкасл” клубларига таклиф қилган. “Эвертон”да катта эҳтимол билан Зинченкодан майдон марказида фойдаланилади. “Нюкасл”га келсак, кўп нарса клубнинг “Астон Вилла”дан Метт Таргеттни сотиб олишига боғлиқ. “Сити” раҳбарияти Зинченкога муносиб пул таклиф қилинса ва унинг ўзи буни хоҳласа, уни қўйиб юборишга тайёрлигини маълум қилди. Футболчининг “Эвертон”га ўтиши мумкинлиги ҳақидаги маълумотни инсайдер Фабрицио Романо тасдиқлади.
Бошқалар ҳам қараб тургани йўқ
Айни вақтда "Манчестер Сити" клуби “Интер” ҳимоячиси Шкринярга қизиқиш билдирмоқда. Гвардиола жамоаси Зинченкони унинг учун қўшимча 30 миллион евро тўлаш эвазига таклиф қилишга тайёр. Маълум қилинишича, “Интер” словакиялик футболчини сақлаб қолмоқчи. Бироқ фойдали таклифни кўриб чиқишга тайёр.
“Барселона” футболчини у хоҳлаётган нархда сотиб олиши қийин масала бўлиб қолмоқда. Аммо “кўк-анорранглилар” “Челси” ҳимоячиси Маркос Алонсони сотиб олмаса, Зинченконинг трансфери амалга ошиши мумкин. “Эвертон” Зинченкога асосий даъвогар деб қаралмоқда. Бироқ футболчи қаерга бормасин, энди унга Чемпионлар лигасида ғалаба қозониш орзусини амалга ошириш анча қийин бўлади. Ҳозирга қадар украиналиклардан фақат Андрей Шевченко ва Анатолий Тимошчук бундай шарафга сазовор бўлган.
