“Қизил иблислар” янги мавсумда чемпионлик учун курашадими?

 

Голландиялик мураббий Эрик Тен Хаг аллақачон “Манчестер Юнайтед” таркибида ўзгартиришлар қилишга киришиб кетган. У жамоага Фергюсон услубини қайтармоқчи. Тен Хак футболчилардан максимал даражада фойдаланишни мақсад қилган.

 

Голланд аллақачон “Манчестер Юнайтед” машғулотларида тартиб-интизом, тўп билан муомала қилиш ва нозик деталларга кўпроқ эътибор қаратган ҳолда бир нечта янгиликлар киритди.

 

Мураббийнинг янги қоидаларига кўра, футболчилар эрталаб соат 9:00 да келишлари керак. Буни айнан Фергюсоннинг ўзи ҳам қўллаган эди. Тен Хак ўйинчиларни кўпроқ мулоқот қилишга ундамоқда.

 

Мураббий ўзининг жамоа билан илк машғулотини 27 июнь куни ўтказди. Ўшанда “Манчестер Юнайтед”нинг баъзи футболчилари таътилдан қайтишган эди. Голландиялик базага эрталаб соат 8:00 да етиб келган. “Manchester Evening News” хабарига кўра, Тен Хаг аллақачон Сер Алекс Фергюсоннинг асосий қоидаларидан бирини қўллаган.

 

Биринчи куни футболчиларнинг бир гуруҳи соат 9:30 да, иккинчиси 11:30 да келган. Уларнинг кўпчилиги жума куни мажбурий тиббий кўрикдан ўтиш ва спорт залида машқ қилиш учун базада бўлган. Икки кунлик таътилдан сўнг жамоа майдонда икки соатлик машғулот ўтказган.

 

Машғулотнинг иккинчи кунида Тен Хаг футболчилардан эрталаб 9:00г а қадар базада бўлишларини талаб қилган. Бу айнан Сер Алекс клубда 26 йил давомида амал оширган иш тартиби эди. Гарчи, Оле-Гуннар Солшер ўйинчиларга 10:00 да келишга рухсат берган бўлсада, норвегияликнинг усуллари жуда тартибсиз бўлган.

 

Тен Хаг, шунингдек, кийиниш хонасида муносабатларни мустаҳкамлаш учун футболчиларни майдондан ташқарида ҳам кўпроқ мулоқот қилишга чақирган.

 

“The Mirror” нашрининг ёзишича, Эрик стадион ходимларига ўтни роппа-роса 15 мм қилиб кесишни буюрган.

 

“Sky Sports” нашри мураббий қўлга урган бир қанча янгиликлар ҳақида маълумот берди. Унда айтилишича голландияликнинг жараёнга жуда шўнғиб кетгани таъкидланган. Бундан ташқари, Тен Хаг жиддий таҳлил ўтказган ва футболчилар тўп билан бирга бўлганда асабийлашишларини аниқлаган. Мураббий аллақачон тўп билан ишлашга қаратилган махсус машқлар ёрдамида бу билан курашмоқда. Машғулотларда Эрик Тен Хаг мунтазам равишда қуйидаги иборани ишлатади: “Етарлича яхши эмас. Менга максимал даражани кўрсатинг”.

 

Мураббий машғулотларда фаол бўлган ўйинчиларни рағбатлантиришни айтиб ўтган. Айрим манбаларнинг қўшимча қилишича, Давид де Хеа “МЮ” ходими билан суҳбатда жамоада тартиб-интизом яхшилангани ҳамда бош мураббийнинг аниқ ғоялари борлигидан мамнунлигини маълум қилган. Клуб ходимлари ҳам Тен Хагдан миннатдор. Улар аллақачон голланд мукаммал мураббийлик маҳоратини намойиш этишига ишонишмоқда.

 

Энди клуб раҳбарияти голландиялик мураббийдан яхши натижаларни кутмоқда. У ҳозирда асосий эътиборини “Барселона” футболчиси Френки де Ёнгга қаратган.

 

Жамшидбек Амиров