Роналду манчестерликлар сафини тарк этмоқчи
Футболчининг олдида бир нечта вариант турибди.
“Манчестер Юнайтед”нинг португалиялик ҳужумчиси Криштиану Роналду манчестерликлар сафини тарк этиши ҳақида турли хабарлар тарқалмоқда. Мазкур масалада Роналдунинг келажаги борасидаги фикрлар қизғин давом этмоқда. Сўнгги маълумотларга кўра ҳужумчи ҳақиқатдан ҳам жамоани тарк этишни истамоқда. Бу ҳақида бир қатор нашрлар янгиликлар эълон қилган. Хусусан, “The Times” ва инсайдер Девид Орнштейн бу борада бир қанча тасдиқланган хабарларни маълум қилган. Аввалроқ, Роналду клубнинг трансферлар ойнасида суст эканлигидан норози бўлиб, жамоадан кетмоқчи эканини айтган эди.
Манчестерни тарк этишига асосий сабаб Криш Чемпионлар лигасида ўйнашни хоҳламоқда. “Манчестер Юнайтед” эса кейинги мавсумда ушбу мусобақада иштирок этмайди.
Кеча клуб машғулотлари бўлиб ўтган, бироқ Роналду ушбу йиғинда қатнашмаган. Бунга футболчининг оилавий шароити сабаб қилиб келтирилган.
“Манчестер Юнайтед” футболчилари 8 июль куни Австралия ва Таиландга мавсумолди тайёргарликларни олиб бориш учун жўнаб кетишади. Сўнгги маълумотларга кўра, Роналдунинг у ерга боришига ҳозирча ишончи комил эмас. Агар бирор муаммо ёки нимадир ёқмаса футболчи машғулотларни ўтказиб юборади.
2020 йил коронавирус авж олган пайтда, Криштиану Португалияга, инсультга чалинган онасининг олдига учиб кетади. Ўша вақтларда у “Ювентус” футболчиси эди. Онасининг ҳолидан хабар олган Роналду дарров клуб базасига қайтмайди. Ўшанда туринликлар Европа чемпионлар лигаси ўйинига кучли тайёргарлик кўраётган эди, аммо Роналду Португалияда қолади. Кейин “Ювентус” раҳбарияти ҳужумчи коронавирусга чалингани ҳақида ёзишди. Шундан бир неча кун ўтиб, Криш “Юве”ни тарк этмоқчи экани ва иккита таклиф олгани ҳақида маълумот пайдо бўлди. Бироқ, португалиялик юлдуз Италия клуби сафида яна бир мавсумни ўтказди.
2021 йилда “Манчестер Сити” Роналдуни ўз сафига қўшиб олишга ҳаракат қилди. Аммо ана шундай нозик вазиятда “Қизил иблислар” футболчи билан музокара олиб бориб, уни ўз сафларига қўшиб олишди. Кришга қизиқаётган жамоалар орасида энг яхши вариант сифатида “Челси” клуби келтирилмоқда. Аммо “Юнайтед” ўз ҳужумчисини рақобатчи жамоаларга сотишни хоҳламаяпти. Ҳозирда бир нечта хабарларга кўра, ҳужумчига “Рома” бош мураббийи Жозе Моуриньо ва “Спортинг” клублари ҳам қизиқиш билдирмоқда. Эслатиб ўтамиз, Криштиану фаолиятини айнан “Спортинг” жамоасида бошлаган эди.
“ESPN” нашри берган хабарга кўра, агар янги клуб футболчининг 30 миллион евролик шартномасини кўрсатилган талабларни бажара олса, “Манчестер” Криштиануни сотишга тайёр.
Нуфузли “The Atletic” нашри “Наполи”нинг ҳам ҳужумчига қизиқаётгани ҳақида ёзган. Бироқ бу маълумот неаполликлар раҳбарияти томонидан рад этилган.
Худди шу нашрнинг хабар беришича, Лондон клуби “Манчестер Юнайтед” португалияликни рақибларига сотишни истамаганига қарамай, Роналдуни сотиб олиш имкониятини кўриб чиқмоқда. Журналистларнинг таъкидлашича, июнь ойида “Челси”нинг янги эгаси Тодд Боули ҳужумчининг агенти Хорхе Мендес билан учрашган. Учрашувда Боули Криштианунинг потенциал трансфери борасида муҳокама ўтказган.
Аммо Роналдунинг келажаги ҳақида энг кутилмаган хабар Испаниядан келди. “AS” нашрининг таъкидлашича, Мендес нафақат Боули, балки “Барселона” президенти Жоан Лапорта билан ҳам учрашган. Учрашувда Криштианунинг Каталонияга кўчиб ўтиши айтилган. Эслатиб ўтамиз, гап “Реал Мадрид” афсонаси ҳақида кетмоқда. Ишониш қийин, гарчи футбол имконсиз нарсанинг иложи борлигини аллақачон исботлаб келган. Ҳозирги вазиятда “Челси” ва “Барса” билан бўлган вариантлар Роналду учун биринчи ўринда турибди. Бундан ташқари, 37 ёшли Криштианунинг молиявий талаблари янги клуб излашни анча қийинлаштирмоқда.
Португалиялик юлдузнинг “Манчестер Юнайтед”да қолиш ёки қолмаслиги ҳозирча сўроқ остида. Футболчи жамоа машғулотларига қайтганидан сўнг “Юнайтед” бош мураббийи Эрик тен Хаг билан гаплашади. Эҳтимол, шундан кейин кўп нарса аниқ бўлиши мумкин.
Жамшидбек Амиров
