Ди Мария Туринга етиб келди
Футболчи “Юве” билан бир йиллик шартнома имзолаган.
Аргентиналик ярим ҳимоячи Анхел Ди Мария “Ювентус” билан шартнома имзолаш учун Туринга етиб келди. Клуб ОАВлари футболчини аэропортда кутиб олишган, шундан сўнг туринликларнинг ижтимоий тармоқлардаги саҳифаларида фото ва видеолар чоп этилган.
Аввалроқ, Ди Марияга бир йиллик шартнома таклиф қилингани хабар қилинганди. Анхел 1 июлдан бери Франциянинг "Пари Сен-Жермен" клуби билан шартнома муддати тугаганидан кейин эркин агентга айланганди. Аргентиналик футболчининг “Ювентус” сафида пайдо бўлишига туринликлар бош мураббийи Массимилиано Аллегри ташаббус кўрсатган.
Эслатиб ўтамиз, Ди Мария “ПСЖ” сафида 295 та ўйинда майдонга тушиб, 93 та гол урди ва 119 та голли узатмани амалга оширди. Клуб билан у беш марта Франция чемпиони бўлди. Анхел аввалроқ “Росарио Сентрал”, “Бенфика”, “Реал Мадрид” ва “Манчестер Юнайтед” клубларида тўп сурган.
