Суд ФИФА раҳбарлари Блаттер ва Платинини оқлади
Аввалроқ улар фирибгарликда айбланган эди.
Швейцария суди фирибгарликда айбланган ФИФА собиқ президенти Ёзеф Блаттер ва ФИФА собиқ вице-президенти Мишел Платинини оқлади. Бу ҳақда “Sky News” нашри хабар бермоқда.
2019 йил декабрида ФИФА Швейцария судларига Блаттер ва Платини устидан 2011 йил февралида Платинига тўланган 2 миллион еврони қайтаришни сўраб даъво қилгани хабар қилинган эди. 1998-2002 йилларда Платини ўша пайтда ФИФА президенти бўлган Блаттернинг маслаҳатчиси бўлиб ишлаган. Шартномага кўра, собиқ француз футболчиси йилига 300 минг франк олган. Бироқ фаолияти тугаганидан йиллар ўтиб, Платини 2 миллион франк тўлашни сўраган. Шундан сўнг ФИФА Блаттер иштирокида 2011 йил бошида кўрсатилган маблағни Платинига ўтказиб берган.
Швейтсария прокуратураси ушбу тўлов ФИФА активларига зарар етказганини ва Платинини ноқонуний равишда бойитганини айтди. Бироқ у ва Блаттер дастлаб йилига 1 миллион франк маош олишга оғзаки келишиб олганликларини ва шу сабабли бу битим амалга оширилганини билдирган.
