Роналду билан Месси бир жамоада ўйнаши мумкин

 

“Манчестер Юнайтед” ҳужумчиси Криштиану Роналдунинг “ПСЖ”га ўтиши мумкинлиги ҳақидаги хабар футбол оламини ҳайратда қолдирди. Португалиялик таниқли инсайдер Педро Алмейданинг сўзларига кўра, “ПСЖ” футбол маслаҳатчиси Луис Кампос аллақачон ҳужумчининг агенти Хорхе Мендес билан эҳтимолий трансфер борасида музокаралар олиб бормоқда.

 

Агар у амалга ошса, бутун дунё бўйлаб миллионлаб футбол ишқибозларининг орзуси ушалади. Натижада португалиялик футболчи ва Лионел Месси битта жамоада ўйнайди. Кўринишидан, парижликлар эгаси Носир Ал-Хелайфи Чемпионлар лигасида ғалаба қозониш учун ҳеч нарсадан қайтмайди.

 

“Манчестер Юнайтед”ни тарк этиш - вақт масаласи. Криштиану Роналдунинг клуб йиғинида йўқлиги ҳақидаги биринчи хабар жиддий қабул қилинмади, аммо клуб Таиланддаги мавсумолди тайёргарлик учун таркибни эълон қилгач, бу аниқ бўлди. Хорижий ОАВ журналистлари аллақачон Кришни “Челси”, “Барселона” ва “Рома”га ўтиши ҳақида маълумотлар тақдим этган. Энди “ПСЖ” варианти Роналду ва клуб учун идеал кўринмоқда.

 

Криш Серхио Рамос билан яна бирга ўйнаши мумкин. Ҳужумчи билан биргаликдаги ўйинлар сони бўйича испаниялик иккинчи ўринда - 339.  Ўтган мавсум Рамос учун оғир кечди. Аммо испаниялик ҳимоячи “ПСЖ” базасида машғулотларни давом эттирмоқда.

 

Роналду ва Мессининг бир жамоада ўйнаш эҳтимоли ортиб бормоқда. Сўнгги йилларда улар биргаликда тўп суриши айтилган бўлсада, бироқ бу амалга ошмаган эди.  Ҳужумчилар шу вақтга қадар 12 та “Олтин тўп”га эга чиқишди. Агар “ПСЖ” раҳбарлари бу икки футболчини бир жамоада бирлаштиролса футбол ишқибозлари учун катта совғани тайёрлашган бўлар эди.

 

“ПСЖ” айни дамда Неймардан қутулмоқчи, Роналду эса унинг ўрнини эгаллаши мумкин. Криш Англияда ажойиб голлар урган бўлса, Францияда ундан ҳам кўпроқ гол уриши турган гап.

 

Мободо Роналду парижликлар сафига қўшиладиган бўлса, яхши шартнома, Чемпионлар лигаси ғолиблиги учун курашиш имконияти, яна бир чемпионлик ва ажойиб статистикага эга бўлади.

 

Албатта, “Манчестер Юнайтед” ва Роналдунинг ўзи эҳтимолий кетиш билан боғлиқ вазият ҳақида қанчалик узоқ сукут сақласа, португалиялик футболчининг атрофида шунчалик кўп миш-мишларнинг тарқалишига олиб келади.

Жамшидбек Амиров