Осиё Кубоги—2023 мезбонлиги учун ҳужжатлар қабул қилиш бошланди
Ҳозирча 4 та мамлакат мусобақага мезбонлик қлиш истагини билдирган.
Осиё Футбол Конфедерацияси (ОФК) ташкилотга аъзо тўртта ассоциациядан Осиё Кубоги—2023 мусобақаси мезбонлиги учун билдиришнома олди. Бу ҳақида ОФК расмий сайти маълум қилди.
Австралия, Индонезия, Жанубий Корея ва Қатар Осиё Кубоги мусобақасига мезбонлик қилиш истагини билдиришган. Осиё Кубоги—2023 га мезбонлик қилиш бўйича ҳужжатларни тақдим этиш 17 июндан бошлаб 31 августга қадар давом этади.
2022 йил 17 октябрь санасида ОФК Ижроия қўмитаси томонидан 24 жамоа иштирок этадиган мусобақа мезбони номи эълон қилинади.
Эслатиб ўтамиз, Осиё Кубоги—2023 мусобақаси Хитойда бўлиб ўтиши режалаштирилган эди. Аммо мамлакатдаги СОВИД-19 пандемияси сабаб ОФК мусобақа Хитойда ўтказилмаслигини маълум қилганди.
Маълумот ўрнида: ушбу мусобақа 2023 йилнинг 16 июндан 16 июлига қадар бўлиб ўтади.
