Дибала нимага “Рома”ни танлади
Бир неча кун олдин Рим клуб футболчининг трансферини эълон қилди.
“Ювентус” ҳужумчиси Пауло Дибала янги клуби борасида бир қарорга келди. Аргентиналик футболчи етти йил давомида Турин клубида ўйнаб келаётган эди. Бир неча кун аввал у “Рома” билан шартнома имзолади. Кимлардир бу танловдан ҳайратга тушишди. Чунки пойтахт клуби келаси мавсумда Чемпионлар лигасида иштирок этмайди. Аммо Дибалага даъво қилган бошқа жамоалар Европадаги энг нуфузли турнирда қатнашишади. Ҳозир Италиядаги энг ёрқин ёзги трансферни таҳлил қиламиз.
Нега Дибала “Ювентус”ни тарк этди
Криштиану Роналду жамоадан кетганидан кейин Дибала Турин клубининг асосий ҳужумкор юлдузига айланди. Бироқ, бу узоқ давом этмади. Мавсум охирида Пауло шартномаси тугаши сабабли “Ювентус”ни тарк этди. Томонлар келишувни узайтириш бўйича музокаралар олиб боришди, аммо бу муваффақиятсиз якунланди. 2021 йилда “Ювентус” футболчига катта маош (йилига 11 миллион евро) бўлган шартнома таклиф қилди, бироқ бир неча ойдан кейин вазият ўзгарди. Музокараларнинг сўнгги босқичида бутунлай бошқача 5,5 миллион евролик шартнома пайдо бўлди.
Натижада Дибала жамоани эркин агент сифатида тарк этди. Бу ҳолат Турин клуби раҳбарияти ва мухлисларини ранжитгани шубҳасиз. Аргентиналик футболчининг нархи 35 миллион еврони ташкил этади. Етти йил олдин “Юве” Дибалани 41 миллион евро эвазига сотиб олганди.
Ўтган мавсумнинг сўнгги уй ўйини олдидан Пауло ижтимоий тармоқда хайрлашув постини ёзди:
“Ҳайрлашиш учун биронта сўз топиш қийин. “Ювентус” билан узоқроқ бирга бўламиз деб ўйлагандим. Аммо шу бугун жамоа билан хайрлашишим зарур экан. Бу клубда бошдан кечирганларимни ҳеч қачон унутмайман. Мен ҳар бир ўйин, ҳар бир голни эслайман. Бу ерда улғайдим, яшадим ва келажак учун орзулар қилдим. Етти йил сеҳрли ўтди. 12 та соврин ва 115 та голни ҳеч ким хотирамдан ўчириб ташлолмайди. Ҳеч қачон”.
“Лацио” билан ўйиндан кейин (2:2) Дибала мухлислар билан хайрлашаётганда кўз ёшларини тия олмади. “Ювентус” бош мураббийи Массимилиано Аллегри футболчига ҳурмат бажо келтирди:
“Пауло етти йилдан бери “Ювентус”нинг муҳим футболчиси бўлиб келди. У бу ерга болалигида келган ва мен унинг шундай футболчи бўлиб етишишига ёрдам берганимдан хурсандман. Дибала ҳар доим барқарор ўйин даражасини кўрсатган ва иштиёқ билан ҳаракат қилган. У мухлисларнинг ҳурматига сазовор футболчи”.
Футболчи учун қайси клублар курашди?
Май ойи охирида аргентиналик футболчидан янги клуби ҳақида сўралганда, ўзи учун ҳали ҳеч қандай қарор қабул қилмаганини айтди. Шу билан бирга, Пауло энг яхши вариантни танлашини таъкидлади. Юлдуз футболчига дастлаб асосий даъвогар сифатида “Интер” клуби қизиқиш билдирди. Милан шаҳри клуби бош директори Беппе Маротта Паулонинг “кўк-қоралар” сафида бўлишига умид билдирди. Машҳур италиялик инсайдер Фабрицио Романонинг ёзишича, “Интер” вице-президенти Хавер Санетти Лондонда Дибала билан шахсан учрашган. Футболчига йилига 6 миллион евро маош билан “3+1” схемаси бўйича шартнома таклиф қилинган.
Июнь ойида “Интер” вакиллари Дибаланинг атрофидагилар билан мунтазам музокаралар олиб боришган. Маротта клуб футболчининг трансфери устида ишлаётганини тасдиқлади, бироқ ҳаммаси молиявий ҳолатга бориб тақалди. Аргентина ОАВларининг хабар беришича, Дибала шартноманинг барча тафсилотлари бўйича келишиб олган, аммо кейинроқ “Сорриере делло Спорт” нашри янги маълумотларни тақдим этган. Манба берган хабарга кўра, томонлар футболчининг маоши борасида муросага келиша олишмаган.
“Тоттенҳем” клуби ҳам Дибаланинг трансфер вариантини ҳам кўриб чиқди. Клуб спорт директори Фабио Паратичи аргентиналик футболчини жуда яхши биларди, сабаби у аввал “Ювентус”да ишлаганди. У футболчи билан музокара олиб борди, аммо томонлар ҳеч қандай муросага кела олишмади. “Даилй Маил” нашрининг ёзишича, бунга ҳам юқори маош сабаб бўлган.
Шундан сўнг Италиянинг яна бир жамоаси “Милан” ҳам Дибала учун давогарлар қаторига кириб борди. “Газзетта делло Спорт” нашри “Интер” Ромелу Лукакуни қайтарганидан сўнг, Италия чемпионининг футболчига қизиқиши ҳақида ёзди. “Милан” айнан мана шу ҳолат Дибалани сотиб олиш имкониятини оширишига умид қилган. Италия клуби раҳбарияти футболчи молиявий талабларни камайтирса, шартнома таклиф қилишга тайёр эди. Журналист Николо Шира кейинроқ “Милан” бу вариантни умуман кўриб чиқмаганини таъкидлади.
Ҳужумчига яна бир даъвогар сифатида “Наполи” клуби ҳам айтилди. Мавсум оралиғида клуб бир қанча етакчи футболчиларини (Лоренсо Инсине, Калиду Кулибали, Дрис Мертенс) йўқотди ва ўз сафига юлдуз футболчини қўшиб олишга умид қилди. Бу билан жамоа раҳбарияти мухлисларнинг норизичиллигини сўндиришга ҳаракат қилган. Бироқ бу ҳаракат ҳам натижасиз якунланди.
Нега Дибала “Рома”ни танлади
Май ойи охирида Рим клуби афсонаси Франческо Тотти Пауло ҳақида гапирди ва футболчига 10-рақамли “Рома” либосини таклиф қилди. Дибала италияликни ўзининг кумири деб атади ва унга мақтовлар учун миннатдорчилик билдирди. Ўшанда аргентиналик футболчи Рим шаҳри жамоасида ўйнаши мумкинлигини ҳеч тасаввур қилолмасди. Бир ой ўтгач, Тотти “Скй Спорт Италиа” нашрига берган интервьюсида ҳужумчи билан шартнома имзолаш эҳтимоли минимал даражада эканлигини айтди. “Энди Дибала бошқа клубда ўйнайди. Мен уни “Рома”га келишига умид қилгандим”, — деди жаҳон чемпиони.
Июль ойида футболчи учун “Ромa” ва “Наполи” қизиқиш билдираётгани маълум бўлган эди. Неапол клуби футболчига кўпроқ маош таклиф қилди, аммо бунда Жозе Моуриньо муҳим роль ўйнади. Португалиялик мураббий шахсан Дибалага қўнғироқ қилиб, уни Рим клуби билан шартнома имзолашга кўндирган. Жозе ҳозирда пойтахт жамоаси томонидан қурилаётган лойиҳани маъқул топди. Пауло Неаполга боришни истамади, чунки у “Наполи”дан уч етакчининг кетиши ва трансфер бозоридаги пассив ишидан кўнгли тўлмади.
Футболчи Моуриньо жамоасига ўтиш сабабларини ҳам ошкор қилди:
“Рома”нинг мени сотиб олишга бўлган ҳаракати ҳал қилувчи роль ўйнади. Мен ўсиб бораётган жамоага қўшилдим. Келажак учун мустаҳкам пойдевор қўйишда давом этаётган клубда фаолиятимни давом эттираман. Жозе Моуриньо билан ишлаш мен учун катта шараф”.
Маълум бўлишича, Моуриньо футболчининг трансферида барча рақобатчиларни ортда қолдирди. “Наполи” ва “Милан” кейинги мавсумда Чемпионлар лигасида иштирок этади. Аммо Дибала бошқа жамоани танлади. “Наполи” футболчига кўпроқ пул таклиф қилди, бироқ у Моур билан телефонда гаплашгач, Рим клубига ўтди. Дибала янги мавсумда Чемпионлар лигасида қатнашмайди, лекин у ўзи хоҳлаган мураббий қўл остида ўйнайди.
Жамшидбек Амиров
