Тошкент аэропортида бепул WI-FI ишга туширилди
Мажмуанинг жўнаб кетиш ва учиб келиш заллари тўлиқ интернет билан қамраб олинган.
Тошкент халқаро аэропортида йўловчилар ва меҳмонлар учун интернет тармоғига уланиш учун WI-FI тармоғи ишга туширилди. Бу ҳақда авиакомпания матбуот хизмати маълум қилди.
“Ўзбектелеком” компанияси билан биргаликда алоқа каналларини улаш ва жиҳозларни ўрнатиш бўйича барча ишлар якунланган. Терминал мажмуасининг бутун ҳудуди — WI-FI тармоғи билан жўнаб кетиш ва учиб келиш заллари тўлиқ қамраб олинган.
Интернетга уланиш учун аэропортга ташриф буюрувчилар #TASAirportUzcloud WI-FI тармоғини қидириб топиши ва “Уланиш” тугмасини босиши кифоя. Тизим фойдаланувчиларни авторизация саҳифасига йўналтиради ва у ерга мобил телефон рақамни киритиш керак бўлади. Авторизацияни тасдиқлаш учун кўрсатилган рақамга SMS хабар юборилади.
Шундан сўнг тизим пуллик ва бепул кириш имкониятларини таклиф этади. Агар тизимдан бепул фойдаланиш танланса, тизим учта қисқа рекламани кўрсатади, сўнг интернетга киришни таъминлайди. Пуллик хизмат танланса, тизим тегишли тариф режасини танлашни таклиф қилади ва тўлов амалга оширилгандан сўнг тариф режасига мувофиқ вақт учун чексиз интернетга кириш тақдим этилади.
