Россияда оғир тан жароҳат олган ўзбекистонлик Ватанга қайтарилди
Фуқаронинг мурожаати Ташқи меҳнат миграцияси томонидан ижобий ҳал этилди.
Асли фарғоналик бўлган М.О. ўтган йилнинг июль ойидан буён Калининград вилоятида ишлаган фуқаро эҳтиётсизлик оқибатида меҳнатга лаёқатсиз бўлиб қолди.
Қийин аҳволга тушиб қолган фуқаро Ўзбекистонга қайтишда ёрдам сўраб, Ташқи меҳнат миграцияси агентлигининг Санкт-Петербург шаҳридаги ваколатхонасига мурожаат қилганида, М.О. қурилиш объектида ишлаётганда баландликдан йиқилиб тушиш оқибатида умуртқа суяги ва оёғи сингани, узоқ муддатга меҳнат қилолмаслиги маълум бўлди.
Қийин аҳволда қолган ҳамюртимизга ёрдам кўрсатилиб, хорижда меҳнат фаолиятини амалга оширувчи фуқароларни қўллаб-қувватлаш ҳамда уларнинг ҳуқуқ ва манфаатларини ҳимоя қилиш жамғармаси маблағлари ҳисобидан авиачипта олиб берилди. У Калининград – Санкт-Петербург – Фарғона йўналишидаги авиарейс орқали Ўзбекистонга қайтарилди.
