Қатар-2022га мезбонлик қиладиган стадионлар
Уларнинг барчаси ўз услубига эга.
Шу йилнинг 21 ноябрь куни Қатар давлатида футбол бўйича жаҳон чемпионати бошланади. Чемпионатда дунёнинг 32 та давлати ғолиблик учун кураш олиб боради. Ҳозирда мамлакатда мусобақага тайёргарлик ишлари юқори даражада амалга оширилмоқда. Қуйида турнирга мезбонлик қиладиган стадионлар билан яқиндан танишамиз.
“Лусаил Айконик”
Стадион 2021 йилнинг 22 ноябрь куни қуриб битказилган, бироқ тўлиқ фойдаланишга топширилмаган. Бу ерда 80 минг мухлис жаҳон чемпионати ўйинларини томоша қилиш имкониятига эга бўлади. Лусаил мамлакат пойтахти Доҳа шаҳридан 20 км узоқликда, жаҳон чемпионати учун махсус қурилган замонавий шаҳар ҳисобланади. Норман Фостернинг архитектура бюроси томонидан лойиҳалаштирилган стадион эса шаҳарнинг марказига айланди. Бу ерда жаҳон чемпионатининг 10 та ўйини, жумладан, ярим финал ва финал ўйинлари бўлиб ўтади. Ташкилотчиларнинг сўзларига кўра, у ерда мактаб, шифохона, савдо маркази, кафе ва ресторанлар жойлашади.
“Кҳалифа Интернатионал”
Мазкур ўйингоҳ 2017 йилнинг май ойида қайта очилган. Мажмуа 44 минг мухлислар сиғимига эга ҳамда Қатардаги энг қадимий стадионлардан бири. У 1976 йилда қурилган ва 2017 йилда қайта реконструкция қилинган. Биринчи учрашув Қатар амири кубоги финали доирасида “Ал-Садд” “Ар-Райя”нни мағлуб этди. Арена Қатарнинг ўтмиши ва келажагини ўзида мужассам этган. Спорт мажмуаси ўта замонавий услубга эга.
“Аҳмад Бин Али”
Мазкур арена 2020 йилнинг декабрь ойида очилган. 40 минг томошабин жаҳон чемпионати баҳсларини майдондан кузатиб бориш имкониятига эга. Стадионда ЖЧ-2022нинг 7 та ўйини бўлиб ўтади: 6 таси гуруҳ босқичи баҳслари ва битта ўйин 1/8 финал учрашуви.
Ушбу стадион лойиҳаси “Паттерн Десигн” архитектура фирмаси томонидан ишлаб чиқилган бўлиб, фирма Эвертон клубининг янги стадионини ҳамда “Этиҳад” аренасининг лойиҳаларини ишлаб чиққан. Қурилиш эса “АEСОМ” компаниясидан томонидан амалга оширилган. Бундан ташқари компания 2010 йилги Жаҳон чемпионати учун ҳам баъзи стадионларни қуришган.
“Ал-Жануб”
Бу спорт комплекси 2019 йилнинг май ойида расман очилган. Стадион 40 минг томошабинга мўлжалланган. Бу Ал-Вакра шаҳридаги жаҳон чемпионатига мезбонлик қиладиган ягона стадион ҳисобланади. Форс кўрфази соҳилидаги шаҳар тарихан балиқчилар шаҳри ҳисобланган, аммо ҳозирда Қатарда иккинчи йирик шаҳарга айланди. Стадион дизайни ўтмишни эслатади - томи анъанавий дҳау қайиқларининг елканлари кўринишида қилинган. Архитектор - британиялик Заҳа Ҳадид. Аренада ЖЧ-2022нинг 7 та ўйини бўлиб ўтади: 6 таси гуруҳ босқич учрашуви ва битта ўйин 1/8 финал баҳси.
“Ал-Тумама”
Стадионнинг очилиши 2021 йил 22 октябрь куни бўлиб ўтган. Мажмуа 40 минг томошабинга мўлжалланган. Стадион лойиҳаси қатарлик архитектор Иброҳим Жайда томонидан ишлаб чиқилган. У анъанавий Қатар тўрли қалпоқчасидан илҳомланган - фасад ушбу бош кийимнинг анъанавий нақшига ўхшайди. Арена ҳудудда ўсадиган дарахт номи билан аталган.
Стадион яқинда, 2021 йил октябрь ойида Қатар Амири кубоги финали доирасида очилган эди. Бу Хавининг "Ал Садд" бошқарувидаги сўнгги ўйинларидан бири бўлди - ва унинг жамоаси “Ал-Риёд”ни пенальтилар cериясида мағлуб этди. Орадан кўп ўтмай, испаниялик мутахассис “Барселона” бош мураббийи этиб тайинланди.
Стадионда ЖЧ-2022нинг 8 та ўйини бўлиб ўтади: 6 таси гуруҳ босқичи баҳси, 1/8 финалнинг битта ўйини ва 1/4 финалнинг битта учрашуви. Спорт мажмуаси ҳудудида спорт тиббиёти маркази ва меҳмонхона жойлашади.
“Таълим шаҳри”
Арена пандемия авж олган вақтда 2020 йилнинг июнь ойида очилган. Стадион 40 минг мухлисга мўлжалланган. Стадион номидан кўриниб турибдики, у Қатарнинг таълим марказида жойлашган. Бу ерда бир нечта йирик университетлари, Қатар Таълим ва фан жамғармасининг штаб-квартираси жойлашган. Ал-Райяндаги бу стадион дунёдаги энг экологик тоза ареналардан бири ҳисобланади. Стадион атрофида катта яшил майдонлар мавжуд.
Стадионда ЖЧ-2022нинг 8 та ўйини бўлиб ўтади: 6 таси гуруҳ босқич, 1/8 финалнинг битта ўйини ва 1/4 финалнинг битта беллашуви. Жаҳон чемпионатидан сўнг трибуналар сиғими икки баробарга қисқаради.
“Рас Абу Абуд”
Стадион 2021 йил ноябрь ойида очилган ва у 40 минг томошабинга мўлжалланган. У улкан юк ташиш контейнерларидан қурилган. Унинг иккинчи номи “Стадион 974. 974” ҳисобланади. Бу Қатарнинг халқаро телефон коди ва қурилиш учун ишлатилган контейнерлар сони. Контейнерлар ичида чакана савдо нуқталари, ҳожатхоналар ва бошқа инфратузилма объектлари жойлаштирилади.
Аренада ЖЧ-2022нинг 7 та ўйини бўлиб ўтади: 6 таси гуруҳ босқич ҳамда битта 1/8 финал учрашуви.
“Ал-Байт”
Ушбу спорт мажмуаси 2021 йил ноябрь ойида очилган бўлиб, 60 минг мухлисни бемалол бағрига сиғдира олади.
Стадион Форс кўрфази қирғоқларида яшаган кўчманчи бадавийларнинг чодирини ёдга солади. Ҳатто аренанинг номи ҳам бу турар жой номи билан боғлиқ. Стадион жуда ҳам экологик тоза ҳудудга жойлашган.
Арена Қатарнинг ўтмиши ва келажаги ўртасидаги боғлиқликни акс эттиради. “Ал-Байт” турнирнинг иккинчи энг муҳим стадионига айланади: у очилиш ўйини ва барча босқичларнинг яна 9 та ўйинига мезбонлик қилади.
Жамшидбек Амиров
