Москвада Ўзбекистон фуқаролари бўлган хостел ёниб кетди
Бу ҳақда Ташқи меҳнат миграцияси агентлиги маълумот берди.
Москва шаҳридаги меҳнат мигрантлари яшаган хостелда содир бўлган ёнғин оқибатида фуқаролар вафот этгани ҳақида оммавий ахборот воситаларида хабарлар тарқалди. Ташқи меҳнат миграцияси агентлигининг Москва шаҳридаги ваколатхонаси тегишли ташкилотлар билан ҳамкорликда ушбу ҳодиса юзасидан ўрганиш ишларини бошлади.
Жорий йил 28 июлдан 29 июлга ўтар кечаси Алма-Атинская кўчасидаги 7-корпус, 2-уйда жойлашган хостелда содир бўлган ёнғин оқибатида 8 нафар фуқаронинг вафот этгани ва 4 нафар фуқаро жароҳат олгани маълум бўлди.
Вафот этганларнинг 2 нафари (С.Н., 2003 йилда туғилган ва А.А., 1986 йилда туғилган) Ўзбекистон фуқаролари эканлиги айтилмоқда.
Ҳодиса юзасидан Братеево тумани тергов қўмитаси томонидан жиноят иши қўзғатилган ва ҳозирги вақтда тергов ҳаракатлари олиб борилмоқда.
Ташқи меҳнат миграцияси агентлиги марҳумларнинг яқинларига ҳамдардлик билдириб, ушбу ҳамюртларимиз жасадларини Ватанга олиб келиш бўйича барча чоралар кўрилишини маълум қилган.
