Конституциявий қонун лойиҳасининг умумхалқ муҳокамаси якунлари бўйича маълумот берилди
Конституциявий қонун лойиҳасини референдумга қўйилишини режалаштирганлиги айтилди.
Бугун Конституциявий қонун лойиҳасининг умумхалқ муҳокамаси якунлари бўйича Қонунчилик палатасидаги масъул қўмиталарнинг брифинги бўлиб ўтди.
Олий Мажлис Қонунчилик палатаси депутати Жаҳонгир Ширинов таклифлар бўйича маълумот берди. Умумхалқ муҳокамаси даврида вазирлик, идора ва ташкилотларда, республика бўйича барча туман ва шаҳарларда, шунингдек Олий Мажлис депутатлари ва сенаторлар, сиёсий партиялар, маҳаллий Кенгаш депутатларининг сайловчилар билан учрашувларида жами 20 мингга яқин муҳокама тадбирлари ташкил қилинди.
Конституцион ислоҳотлар масаласи ОАВда кенг ёритилгани алоҳида қайд этилди. Хусусан, давлат ва нодавлат телеканалларда 11 606 та лавҳалар, интервьюлар, информацион ва махсус кўрсатувлар эфирга узатилди, радиоканалларда 2 997 та информацион ва махсус эшиттиришлар ташкил қилинди.Марказий, ҳудудий ва сиёсий партиялар нашрларида жами 1138 та мақолалар чоп этилди. Конституциявий ислоҳотлар юзасидан интернет нашрлари ва ижтимоий тармоқларда жами 46 720 та ахборот материаллари эълон қилинди.
Умумхалқ муҳокамасига чиқарилгандан сўнг бугунга кадар 150 мингдан ортиқ таклифлар келиб тушди. Таклифларнинг 67 фоизини 30 ёшгача бўлган ёшлар тақдим этган.Ҳудудлар кесимида таклифларнинг энг кўпи Тошкент вилоятидан 13,6 % (20 587 таси), Тошкент шаҳридан 12,5 % (18 933 таси), Андижон вилоятидан 9,3 % (14 020 таси), Хоразм вилоятидан 8,5 % (12 803 таси), Самарқанд вилоятидан 7,7 % (11 601 таси), Фарғона вилоятидан 7,1 % (10 711 таси) келиб тушган.
Хориждаги ватандошлар ҳам умумхалқ муҳокамасида фаол бўлгани маълум қилинди.
"Яна қўмиталарнинг қўшма йиғилишини ўтказамиз, ундан кейин сиёсий партиялар фракцияларида муҳокамалар ўтказамиз ва Олий Мажлис Қонунчилик палатасининг ялпи мажлиси кун тартибига олиб чиқамиз. Албатта ҳар бир жараённи очиқ ва ошкора ёритиб борамиз.Қонун лойиҳасининг матни тайёр бўлиши билан уни депутатларимиз муҳокамасига киритамиз. Депутатларимиз фикрини олган ҳолда кейинчалик тайёр бўладиган Конституциявий қонун лойиҳасини референдумга қўйилишини режалаштирганмиз", — деди брифингда Ж.Ширинов.
