Нурдумда янги боғча ишга тушди
Унинг қурилишига 1 миллиард 331 миллион сўм сарфланган.
Бугун Самарқанд вилояти Нуробод туманида жойлашган Нурдум қишлоғида янги боғча расман очилди. Шу муносабат билан янги бунёд этилган 21-сонли давлат мактабгача таълим ташкилотининг очилиш маросими бўлиб ўтди.
Унда туман ҳокими Ш. Юлдошев, сектор раҳбарлари ва маҳаллий аҳоли вакиллари иштирок этди.
Янги ташкил этилган давлат мактабгача таълим ташкилоти замонавий мебеллар, ўқув-услубий, дидактик материаллар ҳамда турли-хил ўйинчоқлар билан жиҳозланган.
Маълумот ўрнида: ушбу мактабгача таълим ташкилоти 60 ўринли бўлиб, унинг қурилишига вилоят маҳаллий бюджети маблағлари ҳисобидан 1 миллиард 331 миллион сўм маблағ йўналтирилган.
Шунингдек, Нурдум маҳалласида 2 та оилавий нодавлат мактабгача таълим ташкилоти мавжуд бўлиб, мазкур таълим ёшидаги болалар сони 385 нафарни ташкил этади.
