Қозоғистонда уйда сақланган 10 нафар ўзбекистонлик қутқарилди
Улар мажбурий меҳнатга жалб қилиниб, маҳаллий аҳоли томонидан зўравонлик билан ушлаб турилган.
Қозоғистоннинг Олмаота шаҳрида 10 нафар ўзбекистонлик мажбурий меҳнатга жалб қилиниб, маҳаллий аҳоли томонидан зўравонлик билан ушлаб турилгани айтилмоқда.
Аниқланишича, 3 нафар Ўзбекистон фуқароси меҳнатдан фойдаланиш мақсадида мажбуран ушлаб турилган 10 нафар ватандошимизни қутқаришда ёрдам сўраган ва Ўзбекистон Бош консуллигига мурожаат қилган.
Бош консуллик ходимлари Олмаота шаҳар ҳуқуқ-тартибот идоралари вакиллари билан биргаликда Ўзбекистон фуқаролари жойлашган жойга боришган ва сўнг фуқаролар Бўстонлиқ туман ИИБга олиб кетилди. Жиноятчиларга нисбатан Қозоғистон Жиноят кодексининг 389-моддаси билан жиноят иши қўзғатилган.
Зўравонлик билан қўрқитилиб, шахсий уйида сақланган, шахсий буюмлари ва уяли телефонлари олиб қўйилгани айтилган ватандошларимиз “Родник” жамоат фонди билан биргаликда фуқаролар 3 маҳал овқатланадиган ётоқхонага жойлаштирилди.
Тергов тадбирлари ўтказилиб, Ўзбекистон фуқароларига миллий паспортлари ва шахсий буюмлари қайтарилгач, 1 август куни барча фуқаролар Олмаота-Тошкент йўналишидаги автовокзалга кузатиб қўйилган. Ҳозирда улар Ўзбекистонга эсон-омон етиб келишган.
