Маркос Алонсо испан клубига ўтишга яқин турибди
У билан “Барса” музокара ўтказмоқда.
31 ёшли “Челси” ва Испания терма жамоаси ҳимоячиси Маркос Алонсо тез орада “Барселона” билан шартнома имзолаши мумкин. Бу ҳақда журналист Фабрицио Романо ўзининг twitter саҳифасида хабар берди.
Манбага кўра, битим якунланиш арафасида. Маълум қилинишича, шартнома шартлари бир ой олдин келишилган. Томонлар “Челси” бош мураббийи Томас Тухелнинг трансферга розилигини олишлари керак эди, у “Брайтон”дан Марк Кукуреллани сотиб олингани ҳақидаги маълумотдан сўнг Алонсонинг трансферини маъқуллаган.
Алонсонинг “Челси” билан шартномаси 2022/2023 йилги мавсум охиригача амал қилади. Трансфермаркт портал унинг нархини 12 миллион еврога баҳолаган.
Испаниялик футболчи ўтган мавсумда “Челси” сафида барча турнирларда 44 та ўйинда майдонга тушиб, 5 та гол урди ва 4 та голли узатмани амалга оширди.
