“ПСЖ”да ҳозирча ҳаммаси жойида

 

Францияда ҳам футбол мавсуми бошланди. Таркиби янгиланган “ПСЖ” биринчи турданоқ ўзини ажойиб ўйинини кўрсатди.

 

Клуб сафарда бешта гол уриб, “Клермон”ни мағлуб этди. Учрашувда айниқса Лео Месси ажойиб ўйин кўрсатди.

 

Аргентиналик футболчи ўйинда иккита гол урди ва битта голли узатмани амалга оширди.  Аввалига Неймарнинг голли узатмасидан сўнг Месси жарима майдончаси ичида бир неча ҳимоячилар орасида бўлишига қарамай чиройли гол уришга муваффақ бўлди.

 

Биринчи бўлимдаёқ “Клермон”нинг мағлубияти аниқ бўлиб қолди. Мессининг ўйини шунчалик очилиб кетдики, у баҳс давомида жуда эркин ўйнади ва жамоасининг ғалабасига ўзининг муносиб ҳиссасини қўшди.

 

“ПСЖ” бош мураббийи Кристоф Галтиер ҳам бундан жуда мамнун. Мураббий учун Мессини футбол завқига қайтариш вазифаси энг муҳим вазифалардан бири бўлиб кўринмоқда:

 

“У жуда тезкор, жуда аниқ тактик ўйинга эга. Месси қаерга югуришни, қандай позицияни эгаллашни, қайси зонада бўлишни тезда тушунади. У бизнинг футболчилар билан ўйнашни яхши кўради. Лео табассум қилса, бутун жамоа ҳам табассум қилади. У ўтган мавсумни қийин ўтказди, янги жамоага кўникиши қийин бўлди. Аввалги мавсумларда Лео камида 30 та гол урган. Энди у бутунлай тайёр, унинг оилавий ҳаёти, клуби, жамоаси бўйича аниқ режалари бор. Леонинг мавсумни ажойиб ўтказмаслиги учун ҳеч қандай сабаб йўқ”.

 

Агар Месси бўлмаганида биринчи турдаги баҳс Неймар учун аталган бўларди. У ушбу баҳсда ўз ҳисобига учта голли узатма ва битта гол ёздириб қўйди. Бундан ташқари, тўртинчи гол билан бўлган эпизодда бразилиялик бемалол гол уриши мумкин эди, аммо Леога тўп узатди.

 

Неймар бу мавсум бошида “Нант” билан Франция Суперкубогида (4:0) дубл қайд этди ва голли узатмани амалга оширди.

 

“ПСЖ”нинг янги мураббийи ўзининг даҳшатли ҳужум чизиғидаги ўйинчиларидан тўғри фойдаланмоқда. Галтиер 3-4-1-2 схемасига ўтди, у ерда Месси ўзининг энг порлоқ йилларида ўйнаган позициясида пайдо бўлмоқда.

 

Леога ўйин учун максимал эркинлик берилди. Неймар ва Килиан Мбаппе эса яқоол ҳужумчи сифатида олдинга ўтказилди. Бу учликларнинг барчаси позицияларда устунлик қилиши ва ақлбовар ўйинларни кўрсатиш имкониятига эга. Бу эса жамоа муваффақиятида муҳим роль ўйнайди.