UEFА Суперкубоги кимга насиб этади?

 

Бугун Финландия пойтахти Хелсинки шаҳридаги “Олимпийский” стадионида Чемпионлар лигаси ғолиби “Реал Мадрид” ва Европа лигаси кубоги соҳиби “Айнтрахт Франкфурт” ўртасида UEFА Суперкубогининг финал учрашуви бўлиб ўтади.

 

Хелсинкидаги “Олимпийский” стадиони 2016 йилдан 2020 йилгача давом этган реконструкциядан кейин биринчи марта бундай катта тадбирга мезбонлик қилмоқда. Бу мамлакатдаги биринчи йирик Европа футбол финалидир. Аренанинг диққатга сазовор жойи - баландлиги 72,21 метр бўлган минорадир. Финляндиялик спортчи Матти Жарвинен 1932 йилги Олимпиадада айнан шундай масофага найза улоқтирган.

 

Ўтган йилги финал баҳсида “Челси” ва “Виляреал” тўқнаш келганди. Асосий вақт 1:1 ҳисобида якунланган, қўшимча бўлимларда эса лондонликлар пенальтилар cериясида муваффақиятга эришганди. Бу Томас Тухел бошқарувидаги клубнинг қўлга киритган иккинчи Европа кубоги бўлди.

 

Ушбу ёзда “Реал Мадрид” кучли трансфер кампаниясини амалга ошириши кутилганди. Аммо жамоа раҳбарияти томoнидан муҳим харидлар бўлмади. Килиан Мбаппе “ПСЖ”да қолди, Эрлинг Ҳоланд эса “Манчестер Сити”ни танлади. Аммо, 80 миллион eвро эвазига Аурелиен Тчуамени “Монако”дан сотиб олинди. Лекин ҳар ҳолда жамоанинг асосий таркиби унчалик ўзгармади. Шу боис, Карло Анчелотти ўйинга Чемпионлар лигаси финалидаги футболчилардан фойдаланмоқчи эканлигини айтди. “Айнтрахт” ҳам хотиржам. Харидлардан фақат “Байер”дан ҳужумчи Лукас Аларионинг трансфери ва “Милан” ярим ҳимоячиси Енс Петтер Хаугенинг сотиб олинишини қайд этиш мумкин.

 

Ҳар қандай Европа топ-клублари сингари, бу икки жамоа ҳам бир нечта рамзий кўргазма ўйинларини ўтказишди. Жумладан, “Реал Мадрид” ёзда “Барселона”га (0:1) мағлуб бўлди. Бироқ, иккинчи баҳсда “Ювентус” устидан 2:0 ҳисобида ғалаба қозонди. Маҳаллий журналистларнинг фикрича, Анчелотти Суперкубокга жиддий тайёрланмоқда. Шу боис тайёргарлик ҳафтаси номдор жамоалар билан куч синашди.

 

“Айнтрахт” аллақачон мавсумни бошлаб юборган. Жамоа Германия кубогининг биринчи босқичини муаммосиз ўтказди. Аммо, Бундеслиганинг биринчи турида “Бавария”дан олтита гол ўтказиб юборди. Бу яхши старт эмас, лекин айни пайтда бош мураббий футболчилар бу натижага эътибор қаратмасликка ҳамда бор эътиборни “Реал” билан ўйинга қаратишга чақирмоқда.

 

Мутахассислар аллақачон бу учрашув бўйича ўзларининг  фикрларини билдириб ўтишмоқда. Букмекерлар испан клубини фаворит деб ҳисоблашмоқда. Шунингдек, учрашув сермаҳсул ўтиши тахмин қилинмоқда.

Жамшидбек Амиров