Uzbekistan Airways’нинг айрим самолётлари сотилади
Сотилмоқчи бўлган самолётлар 1989 ва 2013 йиллар оралиғида ишлаб чиқарилган.
“Uzbekistan Airways” АЖ айрим самолётлари сотувга қўйилмоқда. Бу бўйича Давлат активларини бошқариш агентлиги “Uzbekistan Airways” АЖнинг айрим самолётлари тури ва русумини инобатга олиб, лотларга бўлган ҳолда сотиш жараёнларини ташкиллаштириш учун хусусийлаштириш бўйича профессионал консалтинг компанияси танлаб олиниши юзасидан танлов эълон қилди.
Барча қизиқиш билдирган талабгорлардан Таклиф тақдим этиш учун сўровномага (RfP) асосан тижорат таклифларини жорий йил 29 август куни соат 18:00 (Тошкент вақти билан)га қадар тақдим этишлари сўралади.
Қайд этилишича, 1989 ва 2013 йиллар оралиғида ишлаб чиқарилган жами 19 та самолёт сотилиши режалаштирилган.
Битим бўйича ишлар Консультант, Буюртмачи ва Сотувчи вакиллари ўртасида яқин ҳамкорликда амалга оширилиши кутилмоқда.
Самолётлар (18 та ҳаво кемалари ва 1 та симулятор) 6 та лотларга бўлинган. Шу билан бирга консультантнинг тавсиялари асосида бозор талаблари ва таҳлил натижаларига мувофиқ лотлар таркиби ўзгартирилиши мумкин.
