Тошкент – Лондон авиарейсидаги юклар манзилига етказилмади
Авиакомпания ҳолат юзасидан изоҳ берди.
Кеча, 28 август куни Тошкент – Лондон йўналишидаги HY-201 авиақатновида йўловчилар юклари ўз манзилига етказилмади. Ҳолат юзасидан “Uzbekistan Airways” АЖ ахборот хизмати расмий баёнoт эълон қилди.
Бунга Airbus 320neo ҳаво кемасининг чекланган тижорат юкланиши сабаб бўлган. Бортга юкланмаган юкларнинг умумий сони 119 ўринни ташкил этади, бу эса 2210 кг миқдорида бўлганлигини англатади. Айни пайтда HY-201 рейси йўловчиларининг юклари Ислом Каримов номидаги Тошкент халқаро аэропортида жойлашган бўлиб, 30 август куни HY-201 рейси билан Лондонга етказилади.
Таъкидланишича, юк барча йўловчиларга етказиб бериш хизмати томонидан кўрсатилган манзилга бепул етказиб берилади.
“Келтирилган ноқулайликлар учун узр сўраймиз”, — дейилади хабарда.
