Мбаппенинг “ПСЖ”даги роли янада ошмоқда
У кеча Чемпионлар лигасида иккита гол уришга эришди.
“ПСЖ” клубида тўп сураётган 23 ёшли франциялик ҳужумчи Килиан Мбаппе “Ювентус”га қарши Европа Чемпионлар лигаси гуруҳ босқичи 1-туридан ўрин олган ўйин ҳамда ўзининг клубдаги янги роли ҳақида гапирди.
“Жамоада янги ролим бор. Мураббий бир вақтнинг ўзида ҳужум марказида бўлишимни, ҳимояга кириб боришимни, Месси ва Неймар ўртасида боғловчи бўлишимни истайди. Мен бу янги ролга қўлимдан келганича мослашишга ҳаракат қиляпман, шу билан бирга ўзгаришлар қилишга ҳаракат қиляпман. Биз ажойиб ўйин кўрсатдик ва ғалаба қозондик. Биз ҳар доим катта жамоаларга қарши ўйнашни хоҳлаймиз. Бундай ўйинларда характер кўрсатишни ҳам билишимиз керак”, — дея Мбаппенинг сўзларидан UEFА матбуот хизмати иқтибос келтирди.
Эслатиб ўтамиз, Мбаппе жорий мавсумда “ПСЖ” сафида барча турнирларда 6 та ўйинда майдонга тушиб, 9 та гол урди. Унинг трансфер нархи 160 миллион еврога баҳоланмоқда. Футболчининг француз клуби билан шартномаси 2025 йилнинг 30 июнига қадар амал қилади.
