"Шаҳарларда уйлар кенгайди, лекин одамларнинг бағри торайди" — Тошқулов

 

Айни пайтда АОКАда Олий ва ўрта махсус таълим вазири Абдуқодир Тошқулов иштирокидаги талабаларни турар-жой билан таъминлаш, ижара ва тўлов-контракт масалалари юзасидан бўлиб ўтаётган матбуот анжумани бўлиб ўтмоқда.

 

Таъкидланишича, 1991-2010 йилларда ётоқхона ўринлари сони камайса камайганки, кўпаймаган. 2010-2016 йилларда 2000 ўринли талабалар турар-жойи барпо этилган. Ҳозирги кунда битта талаба учун турар-жой қиймати 40-50 миллион сўм атрофида, яъни, масалан, 400 ўринли талабалар турар-жойи тахминан 20 млрд сўм атрофида бўлади.

 

2017-2022 йил якуни билан 56 минг ўринли талабалар турар-жойи бўляпти. Бу 2010-2016 йилга нисбатан 28 баробар кўп.

 

Ўзбекистонда 2016 йилда 77 та ОТМ бўлган бўлса айни кунда уларнинг сони 172 тага етди. Унда таҳсил олувчи талабалар эса 200 минг нафардан 800 минг нафарга етди.

 

«Талабалар турар-жойининг етишмаслик муаммоси олий таълим муассасалари, талабалар сонини кўпайтиргунга қадар ҳам кўп эди. Дунё олий таълим тизимини ўрганганимда бир нарсага гувоҳ бўлдим — талабаларни ётоқхона билан 100 фоиз таъминлаган бирорта давлат йўқ.Яқин кунларда ижара шартномаси бекор қилиниши устида иш олиб борилмоқда. Бу эса ижара шартномаси бўлмаса ҳам ижарага турадиган талабага ишонч билдирилади ва ижара ҳақини ярми тўлаб берилади. Бу масала яқин кунларда якунига етади», — деди Олий ва ўрта махсус таълим вазири Абдуқодир Тошқулов.

 

Шунингдек, Тошқулов Президент топшириғи билан ижара учун 120 миллиард пул ажратилган бўлса бундан 15 миллиард сўм ўзлаштирилганини қайд этди.

 

«Хонадон эгалари хоҳламади ижара шартномасини тузишга. 1 январдан солиқлардан озод қилинди, шундай кейин бироз кўпайди.Шаҳарларда уйлар кенгайди, лекин одамларнинг бағри торайди. Минг афсус бугун 20 хонадонли уй бўлса ҳам уйига 4 та талаба қўйишни хоҳламайди одамлар. Одамлар хонадонига талабаларни олишни истамагани учун ижара ва талабалар уйи ҳисобидан қопланяпти», — дея қўшимча қилди у.