Тошкент халқаро аэропортида ёнғин чиқди

 

Бугун, 11 сентябрь куни Тошкент халқаро аэропортидаги учиб кетиш терминалида кичик ёнғин содир бўлди. Бу ҳақда Uzbekistan airports хабар қилмоқда.

 

Ҳодиса жойига “Тошкент” аэропортининг тегишли хизматлари – Аэропорт Ёнғин-қутқарув хизмати, Парвозларни электр-ёритиш билан таъминлаш хизмати ва Авиация хавфсизлиги хизмати навбатчилик бригадалари зудлик билан етиб келишган.

 

Дастлабки маълумотларга кўра, ёнғинга биринчи қават тагидаги трансформатор подстанциясида жойлашган узлуксиз электр таъминотининг (UPS) қисқа туташуви сабаб бўлган. Қисқа туташув оқибатларини бартараф этиш ҳамда воқеа жойида ишлаётган хизматлар ходимларининг хавфсизлигини таъминлаш мақсадида аэропорт терминалини маълум муддатга электр энергиясидан узиб қўйишга қарор қилинган.

 

“Ертўладан эрталаб соат 10:30 атрофида тутун чиқа бошлади. Аэропорт ходимларининг тезкорлиги ва шаҳардан келган ўт ўчириш бригадалари кўмагида ёнғин тезда бартараф этилди. Соат 10:40 да аэропортни вақтинча электр таъминотидан узишга тўғри келди. Бир қатор рейслар кечиктирилди. Ҳозирда аэропортнинг тегишли хизматлари ҳодиса жойида ишламоқда ва қисқа туташув сабабларини бартараф этмоқда”, —  дея изоҳ берган “Uzbekistan Airports Handling” МЧЖ директори Умид Ҳамраев.

 

Айни дамда Олмаотага - KS-128, Нур-Султонга - HY-721 ва Москвага - SU-1975 учаётган рейслар кечиктирилган. Аэропорт хизматлари ҳаво бандаргоҳини имкон қадар тезроқ очиш учун бор кучини сарфламоқда.

 

Ҳозирги вақтга келиб, терминалнинг катта қисмида электр энергияси тикланган. “Тошкент” аэропортининг учиб келиш зали ва маҳаллий авиақатновлар терминали одатдаги режимда фаолият олиб бормоқда.