Тошкентдан Термизга учган самолёт манзилига етиб боролмади
Бунга об-ҳаво ноқулайлиги сабаб бўлган.
Бугун, 11 сентябрь куни Тошкент – Термиз йўналишида парвозни амалга ошираётган самолёт Бухоро аэропортига қўнишга мажбур бўлди. Ҳолат юзасидан “Uzbekistan Airways” АЖ ахборот хизмати расмий муносабат билдирди.
Қайд этилишича, HY-065 Тошкент – Термиз йўналиши бўйича авиақатнови Термиз шаҳридаги об-ҳаво шароити (кучли қум шамоли) туфайли ўз йўналишини ўзгартирган ва ҳаво кемаси Бухоро халқаро аэропортига қўнган.
Ҳозирда 124 нафар йўловчи Бухоро халқаро аеропортида бўлиб турибди. Термиз шаҳрида об-ҳаво ўзгариши билан HY-065 авиақатнови белгиланган йўналиш бўйича амалга оширилади.
“Келтирилган ноқулайликлар учун йўловчилар ва уларни кутиб олувчилардан узр сўраймиз”, — дейилади хабарда.
