Тошкент халқаро аэропортида автотураргоҳлар сони оширилди

 

Учиб кетиш зали олдидаги автотураргоҳ сиғими соябонлар ва савдо шохобчалари олиб ташланиши, хусусан, автобуслар ва таксилар учун юриш линиясининг қайта конфигурацияси ҳисобига 214 тадан 333 тага кенгайтирилди.

 

Йўловчиларни кузатувчи ва кутиб олувчилар учун эса терминалнинг ўзида шароитлар яратилмоқда. Тез орада учиш залининг учинчи қаватида умумий овқатланиш ва чакана савдо шохобчалари ишга тушади.

 

Учиб келиш зали олдида 175 ўринли янги автотураргоҳ қурилди ва мавжуд 122 ўринли автотураргоҳ реконструкция қилинди. Умуман олганда, аэропорт олди ҳудудининг янги лойиҳасига асосан автотураргоҳлардаги жойлар сони 187 фоизга — 336 тадан 630 тагача кўпайтирилди. Кетиш ва келиш заллари орасидаги ёпиқ автотураргоҳ меҳмонхонага ва меҳмонхонадан ташишни амалга оширувчи туристик автобуслар ва микроавтобуслар учун ажратилади.

 

Бошқарув компанияси томонидан тўхташ жойи локацияси ва тўхтаб туриш давомийлигини (соат, кун) ҳисобга олган ҳолда тарифлар ўрнатилди. Хусусан, энг яқин учта автотураргоҳда бир соат (учиб келиш, учиб кетиш, IBK "Toshkent-AERO") туриш 10 000 сўм бўлади. Олисдаги учта автотураргоҳ учун (“Учиш комплекси”, “Рухсатномалар бериш бюроси” ва “Яшил зона”) — 5 000 сўм. Шу билан бирга, барча автотураргоҳларда дастлабки 10 дақиқа бепул бўлади. Кунлик тўлов энг яқин автотураргоҳларда 100 000 сўм, олисдаги автотураргоҳларда 50 000 сўм этиб белгиланди.