Федерер теннисдаги фаолиятини якунлади
У 24 йил давомида 1500 дан ортиқ ўйин ўтказди.
Фаолиятини АҚШ Очиқ чемпионатида якунлаган Серена Уилямс ортидан, бу теннис юлдузи Рожер Федерер спорт билан хайрлашмоқда. Аниқроғи, энди у менежер ва функционер сифатида иш бошлаши кутилмоқда.
“Мен теннисни ҳеч қачон тарк этмайман”
“Охирги пайтларда танамдаги оғриқлар мени кўп қийнади”, — деб ёзган Федерер хайрлашув мактубида. 1500 дан ортиқ ўйин ўтказдим. Шу фурсатда узоқ йиллик фаолиятимни якунлашим кераклигини тушуниб етдим. Теннисга бўлган муҳаббатим туғилганда, мен ҳали бола эдим. Теннисчиларнинг ўйинларини ҳайрат билан кузатардим. Шундан сўнг спортчи бўлишни орзу қила бошладим. Орзуларим мени кўпроқ меҳнат қилишга мажбур қилди. Бу эса ўзимга ишончни оширди. Швейцариялик ёш болакайнинг орзуларини рўёбга чиқаришга ёрдам берган барчага, бутун дунёдаги мухлисларимга чин қалбимдан миннатдорчилик билдирмоқчиман. Теннис сабаб уларга меҳрим ошди ва шуни аниқ айтаманки, мен ҳеч қачон уни тарк этмайман”.
20 карра халқаро мусобақалар ғолибини барча 23 сентябрь куни Лондонда ўтадиган турнирда қатнашишини кутаётганди. Сабаби, у ерда дунё рейтингида юқори поғонада жойлашган Новак Жокович, Рафаэл Надал ва Энди Маррей иштирок этади. Топ теннисчиларнинг ўзаро рақобати мухлисларнинг диққат-марказида бўлиб турибди. Швейцариялик теннисчининг яқинлари спортчи фаолиятида кузатилаётган жароҳатлар сабаб шу қарорга келишга мажбур бўлганини айтмоқда.
“Теннис олами энди аввалгидек бўлмайди”
Теннис ихлосмандларининг барчаси уни жуда соғинади. Мухлислар Рожерни яна теннис ўйнашини кўришни хоҳлайди. 3 июль куни Федерер “Уимблдон” турнирининг 100 йиллиги тантанасига кутилмаган меҳмон сифатида келганида унга бўлган илиқ муносабатдан ҳам буни билиб олиш қийин эмас. Бошқа афсоналарнинг ҳеч бири омманинг бу тарздаги олқишларига сазовор бўлмаган.
Испаниялик теннис юлдузи Рафаэл Надал Федерер ҳақида қуйидаги фикрларни билдириб ўтди: “Рожер, менинг азиз дўстим ва рақибим. Бу кун ҳеч қачон келмаслигига умид қилгандим. Бугун шахсан мен учун балки, бутун теннис олами учун қайғули кундир.
Рожер Федерер фаолиятини 1998 йилда бошлаганди. У бу вақт давомида “Rolex”, “Nike”, “Mercedes-Benz”, “Credit Suisse”, “Jura”, “Moet & Chandon”, “Barilla”, “Lindt” вa “Wilson” каби ҳомийлар билан ҳамкорликда ишлаган.
