Роналду мавсумдаги биринчи голини урди
Бунинг учун футболчига 336 дақиқа керак бўлди.
Кеча оқшом “Манчестер Юнайтед” Европа лигасида “Шериф”ни мағлуб этди. Ҳамда очколар бўйича Молдова клубига етиб олди. Учрашувдаги голларга Санчо ва Роналду муаллифлик қилишди.
Португалиялик футболчи пенальтини аниқ амалга оширди ва мавсумдаги биринчи голига муаллифлик қилди. Криштиану марказга зарба берди, дарвозабон эса ўнг томонига сакради.
Голдан кейин Роналду ўзининг одатий анаъанасига содиқ қолиб голни ҳар доимги усулда нишонлади. “The Atletic” инглиз нашри таъкидлаганидек, ўша пайтда ҳатто Тирасполдаги маҳаллий мухлислар ҳам синхрон тарзда “cиу” қўшиғини куйлашди. Бу сўзни Роналду ўз голларини нишонлаётган ҳолда талаффуз қилади.
Роналду ўйинда 81 дақиқа ҳаракат қилди. Кейин эса Эланга унинг ўрнига майдонга тушди. Учрашувдан сўнг ҳар икки жамоа футболчилари Криштианунинг олдига келишиб, у билан селфига тушишди. Шу тариқа Роналду фаолиятидаги 699-голини урди. Португалиялик юлдузга бу мавсумда биринчи голини уриш учун 336 дақиқа керак бўлди.
