Кутилган ва кутилмаган сўнги ҳафталарнинг трансферлари

 

 

1 cентябр куни Европанинг топ-лигаларида трансфер ойнаси ёпилди. Шунга қарамай, кейинчалик яна бир қанча муҳим битимлар амалга оширилди. Биринчидан, Туркия чемпионатида бир ҳафтадан сўнг трансфер ойнаси ёпилди. Иккинчидан, клублар йилнинг исталган вақтида эркин агент билан шартнома имзолаш имкониятига эга. Қуйида сўнгги ҳафталарнинг асосий трансферлари ҳақида сўз боради.

 

Миши Батшуайи (“Челси” → “Фенербахче”, 3,5 миллион евро)

 

Бельгиялик ҳужумчи 2016 йилнинг ёзида “Челси” сафига келиб қўшилган, аммо асосий таркибда ўз ўрнини тополмаган. Батшуайи доимий равишда ижара асосида бир қанча клубларда ўйнаган. У Дортмунднинг “Боруссия”, “Валенция”, “Кристал Пелас”, “Бешиктош” клубларида ўйнаган. “Челси” ниҳоят кераксиз ҳужумчидан қутулиб, Туркия чемпионатига сотиб юборди. 28 ёшли Миши “Фенербахче” учун Европа лигасида иккита ўйин ўтказди ва битта гол урди.

 

Марсело (“Реал Мадрид” → “Олимпиакос”, эркин агент)

 

“Олимпиакос” юлдуз футболчининг профессионал фаолиятидаги учинчи клуб ҳисобланади. Марсело “Реал”да 15 йилдан кўпроқ вақт ўтказди ҳамда 546 ўйинда иштирок этди. Бу вақт ичида 5 марта Чемпионлар лигасида ғолиб чиқди. У шартнома муддати тугаши муносабати билан Мадрид клубини тарк этиб, Грецияга йўл олди. “Олимпиакос” мухлислари ушбу келишувдан хурсанд бўлишди ва 34 ёшли футболчини чиройли кутиб олишди. Бразилиялик футболчининг Пирейдаги тақдимотига 25 минг киши ташриф буюрди.

 

Ян Вертонген (“Бенфика” → “Андерлехт”, эркин агент)

 

35 ёшли ҳимоячи ватанига қайтишга қарор қилди. 2006 йилда Вертонген Бельгияни тарк этди ва шундан бери ўз ватанининг бирорта клубида ўйнамаганди. Cентябр ойи бошида Ян “Андерлехт” билан икки йиллик шартнома имзолади ва янги жамоасида аллақачон учта ўйин ўтказди. Футболчининг энг яхши йиллари “Аякс” ва “Тоттенҳем”да ўтган.

 

Миралем Пянич (“Барселона” → “Шаржа”, эркин агент)

 

32 ёшли ярим ҳимоячи фаолиятида илк бор Европадан ташқаридаги клуб билан шартнома имзолади. Босниялик футболчи “Ювентус” ва “Барселона” каби таниқли жамоаларда тўп сурган. Энди эса у Арабистон яримороли жамоасида ўйнайди.

 

Хуан Мата (“Манчестер Юнайтед” → “Галатасарой”, эркин агент)

 

Испаниялик футболчи 2011 йилдан буён Англияда тўп суради. Умумий ҳисобда у “Челси” ва “Манчестер Юнайтед”да 400 дан ортиқ ўйин ўтказган. Мата шартномаси тугаши муносабати билан Манчестерни тарк этди ва Галатасарой билан 1+1 кўринишида шартнома имзолади. Турк клуби кучли трансфер кампаниясини ишга солди ва 34 ёшли Матанинг трансферини бир ҳафта олдин ишлаб чиқди. Хуан ўтган мавсумда “Юнайтед” сафида бор-йўғи 12 та ўйинда майдонга тушди, шунинг учун томонлар ҳамкорликни янгилашмади.

 

Мауро Икарди (“ПСЖ” → “Галатасарой”, ижара)

 

Ўтган мавсумда ҳужумчи ўртача статистикага эга эди - 30 ўйинда бешта гол. Бу ёзда Икарди “ПСЖ” сафида бирорта ҳам ўйин ўтказмади, чунки у рақобатни юлдуз жамоадошларига бой берди. Бу вазиятда аргентиналик барқарор ўйин амалиёти билан таъминланиши мумкин бўлган клубга ўтгани мантиқан тўғридек кўринарди. 29 ёшли Икарди аллақачон “Галатасарой” сафида дебют қилган.

 

Хамес Родригес (“Ал-Райян” → “Олимпиакос”, эркин агент)

 

Саккиз йил муқаддам колумбиялик футболчи Бразилиядаги жаҳон чемпионати тўпурарлари рўйхатида биринчи ўринни эгаллаганди. Ўтган мавсумни у Қатарда ўтказди. “Ар-Райян” клуби уни 8 миллион еврога сотиб олди. У ерда Родригес 15 та ўйинда иштирок этди ва “гол+пас”да 12 (5+7) очко тўплади. Энди 31 ёшли футболчи Марсело билан бирга Грециянинг топ клубига қўшилди.