Ўзбекистон барча соҳаларда ишончли ҳамкоримиз—Гутерриш
Владимир Норов БМТ Бош котиби билан учрашди.
Кеча, 19 сентябрь куни Ўзбекистон Республикаси Ташқи ишлар вазири Владимир Норов БМТнинг Нью-Йоркдаги бош қароргоҳида Бирлашган Миллатлар Ташкилоти Бош котиби Антонио Гутерриш билан учрашув ўтказди. Бу ҳақда вазирлик матбуот хизмати хабар қилди.
Учрашувда В.Норов Ўзбекистон БМТни осойишталик ва барқарор ривожланишни таъминлаш, бутун дунёда инсон ҳуқуқларини ҳимоя қилиш бўйича универсал ва ишончли халқаро тузилма деб билишини таъкидлаган.
Сўнгги йилларда Ўзбекистоннинг БМТ ва унинг ихтисослаштирилган муассасалари фаолиятидаги иштироки жадаллашгани мамнуният билан қайд этилган. Ўзбекистон Республикаси Президенти Шавкат Мирзиёевнинг ташаббуси билан БМТ Бош Ассамблеясининг турли йўналишлардаги бешта резолюцияси қабул қилинган.
А.Гутерриш Ўзбекистон Раҳбариятининг ортга қайтмас хусусиятга эга илғор кенг кўламли ўзгаришларни амалга оширишга бўлган сиёсий иродаси ва қатъиятини юқори баҳолаган. БМТ Ўзбекистонни очиқлик ва ислоҳотлар сиёсатини амалга ошириш йўлида ҳар томонлама қўллаб-қувватлашга тайёрлиги таъкидланган.
Бош котиб Ўзбекистон ва БМТ ўртасида жадал кенгайиб бораётган ҳамкорликни олқишлаган.
“Ўзбекистон тинчлик, хавфсизлик, инсон ҳуқуқлари масалаларидан тортиб иқлим ва барқарор ривожланишгача бўлган барча соҳалардаги ишончли ҳамкоримиздир. Мамлакат БМТнинг кўп томонлама кун тартибини илгари суришда этакчи ўринни эгаллайди”, — деган А.Гутерриш.
Ўзбекистоннинг Орол денгизи қуриши оқибатларини юмшатиш, Оролбўйи аҳолисининг турмуш даражаси ва сифатини ошириш, минтақада замонавий уй-жойлар, ижтимоий ва саноат инфратузилмаси обектларини қуриш борасидаги саъй-ҳаракатлари БМТ томонидан юқори баҳоланиши маълум қилинган.
БМТ, шунингдек, Ўзбекистон томонидан минтақавий ўзаро боғлиқликни мустаҳкамлаш бўйича амалга оширилаётган лойиҳалар, жумладан, “Термиз–Мозори-Шариф–Кобул–Пешовар” темирйўлини қурилишини ҳар томонлама қўллаб-қувватлаши маълум қилинган.
Учрашув якунида томонларни қизиқтирган масалалар бўйича яқин мулоқотни давом эттириш тўғрисида келишиб олинган.
