С5+1 учрашуви Самарқандда: Марко Рубио Ўзбекистонга келади
АҚШ Давлат котиби 100 дан ортиқ Америка компанияси вакилларидан иборат делегацияга бошчилик қилади.
АҚШ Давлат котиби Марко Рубио октябрь ойи ўрталарида 100 дан ортиқ Америка компаниясидан иборат бизнес делегациясига бошчилик қилиб, Самарқандга ташриф буюради. Бу ҳақда АҚШ президентининг Жанубий ва Марказий Осиё бўйича махсус вакили Сержио Гор маълум қилди.
Ташрифдан кўзланган мақсад АҚШ–Марказий Осиё стратегик шериклигини ривожлантириш, икки томонлама дипломатик ва савдо-иқтисодий ҳамкорликни мустаҳкамлашдан иборат.
Рубио ташриф доирасида Қозоғистон, Қирғизистон, Тожикистон, Туркманистон ва Ўзбекистон ташқи ишлар вазирлари иштирокидаги С5+1 вазирлар учрашувида қатнашади. С5+1 АҚШ ва Марказий Осиёнинг беш давлати ўртасидаги минтақавий дипломатик платформа ҳисобланади.
Учрашувда Марказий Осиёда савдо-иқтисодий алоқаларни кенгайтириш, энергетика хавфсизлигини мустаҳкамлаш ва умумий минтақавий масалаларни ҳамкорликда ҳал этиш йўллари муҳокама қилиниши кутилмоқда.
Шунингдек, Рубио Ўзбекистон ва минтақа давлатлари вакиллари билан учрашувларда савдони кенгайтириш, хусусий сектор инвестицияларини рағбатлантириш ва иқтисодиётни модернизация қилиш масалаларини муҳокама қилади.
