Зиданнинг олдида бир нечта вариант бор
Мураббий тез орада янги жамоасида иш бошлаши мумкин.
Зинедин Зидан 2021 йилги мавсум оралиғида “Реал Мадрид” бош мураббийлигидан кетди. Ёзда франциялик мураббийнинг фаолиятидаги танаффус тугашига кўпчилик ишонч билдираётган эди.
“RMC Sport” нашрининг хабарига кўра, Зидан фақат “ПСЖ”, “Бавария”, “Ювентус” ва “Реал Мадрид” жамоаларида ишлашга тайёр. Мураббий Премьер-лигадаги вариантларни қатъиян рад этмоқда. Зинедин шу ёзда “ПСЖ” билан музокара олиб борди, бироқ сўнгги лаҳзада келишув барбод бўлди. Кейинчалик парижликларга Кристоф Галтиер бош мураббий этиб тайинди. “Реал Мадрид”да ҳам ҳозир ҳаммаси жойида. Ўтган йили Чемпионлар лигаси ғолиблигини қўлга киритган клуб бу мавсумни ҳам ажойиб тарзда ўтказмоқда.
“Бавария” ва “Ювентус”да эса вазият бошқача. Зиданнинг рўйхатидан жой олган иккала клуб ҳам мавсум бошидан муаммоларга дуч келмоқда. Шу сабабдан, жамоалар бош мураббийлар Жулиан Нагелсманн ва Массимилиано Аллегрини истеъфога чиқариш ҳақида ўйлаб кўришлари мумкин.
“Бавария” Чемпионлар лигасининг дастлабки икки турида “Интер” ва “Барселона”ни мағлуб этди. Бу бош мураббий Юлиан Нагелсманни ишдан бўшатмасликка асосий сабаб бўлиши мумкин. Бироқ, мюнхенликларнинг Бундеслигада муваффақиятсиз иштирок этмоқда. Клуб ҳозирда 12 очко билан турнир жадвалида бешинчи ўринда бормоқда.
“Бавария”да Германия чемпионатидаги вазиятни тўғирлаш учун кўп вақт бор. Шу билан бирга, жамоанинг ҳужумкор ўйини мухлислар ва раҳбариятни хавотирга солмаса керак. “Бавария” ҳали ҳам тўққизлик ҳужумчи сотиб олгани йўқ. Мюнхенлик футболчилар учун рақибларнинг кучли ҳимоя чизиғини ёриб ўтиш катта муаммо бўлмоқда.
Нагелсманн яқинда “Аугсбург”дан учралган мағлубиятдан сўнг танқидларга жавоб беришга мажбур бўлди. “Бугун ҳеч қайси футболчини ажратиб кўрсатмайман. Сўнгги салбий тенденция яхши эмас. Кўп нарса ўзгариши керак. Мен яхшилаб ўйлаб кўраман, кейин кўрамиз. Жамоага тўққизлик ҳужумчиси етишмаяптими? Ҳа ёки йўқ десам нима ўзгаради? Йўқ десам, одамлар у муаммони тан олишни истамайди, дейишади. Ҳа деб жавоб берсам, унга Левандовски етишмайди дейишади”, — деди Нагелсманн.
Нагелсманнинг “Бавария”сида 2020 йилда Чемпионлар лигасида ғолиб чиққан жамоадаги муҳит етишмаяпти. Оддий қилиб айтганда, клуб ўз йўлидаги барча рақибларни мағлуб этишбга қурби етмай қоляпти.
“Sport1.de” хабарига кўра, “Бавария”даги муҳит таранглигича қолмоқда. Шу билан бирга, Нагелсманн жамоани бошқариш услуби учун мунтазам танқидлар остида қолмоқда.
“Бавария”нинг юқори лавозимли амалдорлари Оливер Кан ва Ҳасан Салиҳамиджич турли хил вариантларни, жумладан, Нагелсманн билан хайрлашишни ҳам ўйлаб кўришлари керак. Бундан ташқари, бозорда унинг ўрнини босувчи Зидан вариант кўриб чиқилиши мумкин.
“Бавария” ва Зидан бир неча сабабларга кўра бир-бирига жуда мос келади. Биринчидан, Зинедин шаклланиб бўлган топ жамоага келиб қўшилади. Зидан Нагелсманга қараганда анча обрўли, шунинг учун иш муҳити билан боғлиқ муаммо жуда тез ҳал бўлади. Иккинчидан, “Бавария”га у каби Чемпионлар лигаси мутахассиси керак. Зиданнинг ўзи ҳам бор эътиборини фақат еврокубоклар турнирига қаратади.
Бундеслигадаги ҳолатни Нагелсманн охир-оқибат ижобий томонга ўзгартириши мумкин. Аммо “Бавария” каби клуб катта турнирлар ҳақида ўйлайди. Клубга Зинедин келадиган бўлса, “Бавария”нинг Чемпионлар лигасида ғалаба қозониш имконияти анча ошиши мумкин.
Зидан ўзининг футболчилик фаолиятининг беш йилини (1996-2001) ажойиб тарзда ўтказган “Ювентус”га ҳам ўтиш эҳтимоли бор. “Ювентус” франциялик мураббийнинг рўйхатидан жой олганининг ягона сабаби ҳам шу.
“Ювентус” Чемпионлар лигасининг дастлабки икки ўйинида мағлуб бўлди ва А Cериянинг 7 туридан сўнг бор-йўғи 10 очко тўплади. Муваффақиятсизликка бош мураббий Массимилиано Аллегри айбдор деб айтилмоқда.
“Ювентус”нинг таркиби катта муаммоларни ҳал қилиш учун яроқсиз бўлиб кўринмоқда. Мамлакат чемпионатидаги вазиятни ўнглашни иложи бор, бироқ Чемпионлар лигасида ғалаба қозониш имконияти пастдек кўринади.
Агар Аллегри ўрнини Зидан эгаллайдиган бўлса, “Ювентус”да катта ўзгаришлар бўлиши мумкин. Франциялик мураббий А Cерияда жамоа мавқеини яхшилаши мумкин. Агар клуб раҳбарияти Зиданга қишда трансферларни амалга ошириш имкониятини бермаса, жамоа Чемпионлар лигасида яхши иштирок этмаслиги мумкин.
Зидан “L'Équipe” нашрига июнь ойида берган интервьюсида Франция терма жамоаси бош мураббийи бўлиш истаги борлигини маълум қилган эди. Зинедин бунга ҳам тўлалигича аниқлик киритмади. Аммо у Қатардаги жаҳон чемпионатидан кейин Диде Дешамнинг ўрнини эгаллашига умид қилаётгани аниқ. Дешам терма жамоани тарк этиш ниятини билдирмади, Франция футбол федерацияси эса Зиданга ҳеч қандай кафолат бермади.
Шу сабабдан яқин орада Зидан ҳам янги клубида ёки терма жамоада иш бошлаши мумкин.
