“Ювентус” муаммолар ичида қолди
Клуб бош мураббийи ишдан кетиши мумкин.
“Ювентус” мавсум бошида омадсизликка учради. Италия клуби сўнгги 8 учрашувда фақат битта ғалабага эришди. А cерияда Массимилиано Аллегри шогирдлари 10 очко билан саккизинчи ўринда бормоқда. Чемпионлар лигасида “ПСЖ” ва “Бенфика”га мағлуб бўлди. Бу эса жамоанинг плей-оффга чиқиш вазифасини анча қийинлаштиради.
Бундай муаммолар сабаб бош мураббийнинг истеъфоси ҳақида гап-сўзлар тарқалди. “Corriere della Sera” нашрининг хабарига кўра, “Ювентус” вице-президенти Павел Недвед клуб президенти Андреа Анелли, спорт директори Федерико Черубини ва бош директор Маурицио Арривабене билан бўлган учрашувда аллақачон мураббийни ишдан бўшатиш масаласини кўтарган.
Агнелли ва Арривабене Недведни қўллаб-қувватламади. Аллегрининг истеъфоси солиқлардан ташқари “Ювентус”га 21 миллион еврога тушади. Мутахасислар мана шу жиҳатга асосий эътиборни қаратишни сўрашмоқда.
“Ювентус” жуда ҳам кучсиз ўйин кўрсатиб, натижага эриша олмаяпти. Футболчилар ва бош мураббий ўртасида алоқа узилиб қолган. “Sky Sport Italia” нашрининг таъкидлашича, бундай вазиятда ҳам Аллегрини ишдан бўшатиш масаласи кўриб чиқилмайди. Мураббийнинг шартномаси 2025 йилгача амал қилади, шу боис раҳбарият 20 миллион евродан ортиқ товон пули тўлашни истамаяпти.
“Ювентус”да маълум ўзгаришлар рўй бериши мумкин, аммо улар Аллегрига тегишли эмас. “Football Italia” хабарига кўра, гап жисмоний тайёргарликка масъул мураббийлар ҳақида кетмоқда. Бир қатор асосий футболчилар жароҳат сабаб мавсум бошини ўтказиб юборишади. Булар Пол Погба, Федерико Кеза, Войтсех Шесни, Анхел Ди Мария ва Адриен Рабёлардир.
Айнан асосий ижрочиларнинг йўқлиги Аллегри жамоасининг муваффақиятсизлигига сабаб бўлмоқда. Шу билан бирга, мураббий ишдан бўшатишларидан қўрқмаслигини ва жавобгарликни ўз зиммасига олмоқчи эмаслигини таъкидлаган.
Мухлислар ва мутахассислар “Ювентус” раҳбариятидан фарқли равишда Аллегрини кескин танқид қилмоқда.
Арривабене ва Аллегрининг хотиржамлиги “Ювентус” мухлислари ва футбол жамоатчилигига ёқмаяпти. Турин клуби мухлислари мураббийнинг истеъфосини талаб қилмоқда. Чемпионлар лигасининг 2-тури доирасидаги “Бенфика”га қарши ўйиндаги мағлубиятдан сўнг мураббийнинг жамоадан кетишини истовчилар ижтимоий тармоқлар орқали кўплаб норозичилик билдирди.
А cерия доирасидаги “Монза”га қарши ўйиндан сўнг, Аллегри “Ювентус”нинг кийиниш хонасига йўл олаётганида уни полиция кузатиб борди. Мухлисларнинг ғазаби ҳақиқатан ҳам кучли эди. Экспертлар жамоаси ҳам Массимилианони аямаяпти. “Юве”нинг собиқ ҳужумчиси Фабрицио Раванелли жамоани руҳсиз деб атади.
Шундай бўлсада, Аллегри жамоадаги муаммоларни ҳал қила олмаслигини айтмоқда. Агар, жамоа Чемпионлар лигасида “Маккаби”ни ҳам мағлуб эта олмаса, Аннелли ва Арривабененинг сабри тугаши мумкин ва улар мавсумни сақлаб қолиш умидида мураббийни ишдан бўшатишлари мумкин.
Ҳозирги кунда бир нечта яхши мураббийлар ишсиз. Томас Тухел улардан бири. Миш-мишларга кўра “Ювентус” у билан боғлаган. Аммо, инсайдер Николо Ширанинг хабар беришича, собиқ “Челси” мураббийи Турин клуби билан ҳали алоқага чиқмаган. Агар яқин ҳафталарда Юлиан Нагелсманн масаласи ҳал бўлса, Томас “Бавария”га бош мураббий этиб тайинланиши мумкин. Клуб олдида яна битта вариант бор. Бу “Реал”ни уч бор Чемпионлар лигаси ғолибига айлантирган
Зидан. Франциялик мураббийнинг муаммоли “Юве”ни қабул қилишга тайёрлиги ҳақида саволлар бор, бироқ томонлар музокаралар жараёни орқали бир тўхтамга келишлари мумкин.
Айни пайтда бош мураббийни ишдан бўшатиш кун тартибида эмас. Агнелли ва Арривабене Аллегри муаммоларни ҳал қилишига умид қилмоқда. Эҳтимол, бир мунча вақт “Ювентус” ҳақиқатан ҳам яхши томонга ўзгарар. Бироқ, Аллегри бошчилигидаги жамоанинг муваффақиятига ишониш қийин. Катта эҳтимол билан “ПСЖ” ва “Бенфика” чемпионлар лигаси гуруҳида дастлабки икки ўринни эгаллайди. А cерияда чемпионлик учун кураш ҳам муаммоли деб қаралмоқда.
