“Барса”нинг беш нафар футболчиси жароҳат олди

 

“Барселона” футболчилари бирин-кетин жароҳат олишмоқда. Халқаро ўйинлардаги “пауза” Хави жамоасининг зарарига ишлади. Жароҳатлар туфайли клуб бирданига беш нафар футболчини йўқотиши мумкин. Қуйида ҳар бир ҳолатни батафсил баён қиламиз.

 

Жюл Кунде, Франция

 

22 сентябрь куни Франция Австрия билан тўқнаш келди ва “Барселона” ҳимоячиси ўйин вақтида жароҳат олди. Кунде учрашувни давом эттира олмади. 23-дақиқада Диде Дешам унинг ўрнига Уилям Салибани туширди. Ҳимоячига Ахиллес тендонида муаммо ташхиси қўйилган, шу сабабли у 3-4 ҳафтани ўтказиб юборади. “АS” нашрининг хабарига кўра, Кунде Хави билан гаплашган ва унга тезроқ майдонга қайтиш учун ҳамма нарсани қилиш нияти ҳақида айтган. Ҳимоячи “Реал”га қарши ўйин учун ўзига жой қолдиришни сўраган. Франциялик футболчи жорий мавсумда “Барселона” сафида бешта ўйинда майдонга тушди ва “Севиля”га қарши ўйинда иккита голли узатмани амалга оширди.

 

Роналд Араухо, Уругвай

 

Роналд Араухо Эрон билан ўйинда жароҳат олди ва тўртинчи дақиқадаёқ алмаштирилди. Текширувда ҳимоячининг ўнг сонида синиш аниқланган. Футболчини Финляндияда операция кутмоқда. Араухога қандай муносабатда бўлишидан қатъи назар, у олти-саккиз ҳафтани ўтказиб юборади. Испан ОАВ манбаларининг хабар беришича, бу қарорда жаҳон чемпионати омили ҳал қилувчи омил бўлмаган. Араухони танлаш “Барселона” шифокорларининг фикрига боғлиқ эди. У клуб шифокорларининг маслаҳатига эътибор бермай, операсиядан бош тортган Самуэл Умтити ва Ансу Фати йўлидан боришни истамади.

 

“Diario Sport” нашри берган хабарга кўра, Уругвай терма жамоаси вакиллари Араухога босим ўтказиб, жаҳон чемпионатида қатнашиш учун уни операциядан воз кечишга ундашган. Уругвайликлар август ойидан бери жароҳат олган Диего Годиннинг соғлиғи билан боғлиқ муаммолар туфайли “Барсa” ҳимоячисига умид қилмоқда. Шунингдек, “Барселона”| FIFАдан Араухонинг Уругвай терма жамоаси билан ўйинда олган жароҳати учун товон пули олади. Бу ҳақда “Mundo Deportivo” хабар бермоқда.

 

Мемфис Депай, Нидерландия

 

Ҳужумчи Миллатлар лигасида Полша билан ўйинда жароҳат олганди. 52-дақиқада ҳужумчи ўрнига Венсан Янссен майдонга тушди. Депай жароҳат туфайли қанча ўйинни ўтказиб юбориши ҳозирча аниқ эмас, лекин Кундедан фарқли ўлароқ, у катта эҳтимол билан “Реал”га қарши баҳсда майдонга тушади.

 

Френкие де Жонг, Нидерландия

 

Ярим ҳимоячи Полша билан тўлиқ ўйин ўтказмади. Де Ёнг биринчи бўлим билан чегараланиб, Голландия терма жамоаси жойлашган жойни тарк этди ва Бельгия билан баҳсда ўйнамади. Норасмий маълумотларга кўра, голландияликнинг мушаклари билан боғлиқ муаммолар бор, шу сабабли у 10 кундан кўпроқ вақтни ўтказиб юборади.

 

Усмон Дембеле, Франция

 

Француз футболчиси Австрия билан ўйинда 11 дақиқа ҳаракат қилди, аммо Дания билан ўйинда захирада қолди. Бир кун аввал, “L'Equipe” нашри хабарига кўра, Дембеле оёғидан жароҳат олиб, жамоа йиғинини ўтказиб юборган. ОАВ хабарларига қараганда, ҳужумчи кейинги ўйинда майдонга тушади. Лекин, ҳаммаси клубдаги текширувдан сўнг маълум бўлади.

 

“Барселона”да терма жамоаларга чақирилган 20 нафар футболчи бор ва улардан 13 нафари клубга қайтишдан олдин яна битта ўйин ўтказади. Улар орасида Роберт Левандовски ҳам бор, у Уэлс билан ўйиннинг 90 дақиқасини майдонда ўтказган бўлсада, бу вақт давомида оёқларида оғриқ ҳис қилган. Демак, жароҳатланганлар рўйхати ортиши мумкин ва Хави аллақачон бу борада бош қотиришни бошлаган.