Лукаку “Челси”га яна қайтадими?
Лондонликларнинг янги мураббийи бельгиялик футболчига қизиқиш билдирмоқда.
“Челси” 2022 йилги мавсум оралиғида трансфер бозорида Европада энг кўп пул сарфлаган клубга айланди. Жамоа трансферлар учун 278,9 миллион евро ишлатган. Ҳозирча сармоялар ўзини оқламади. “Кўк-анорранглилар” мавсумни беқарор бошлаганидан сўнг Томас Тухелни бош мураббийлик лавозимидан бўшатди. Унинг ўрнига келган Грем Поттер бир неча ҳафталик иш жараёнида жамоани тубдан ўзгартира олмади.
“Челси” Загребнинг “Динамо”си ва “Залсбург”га қарши ўйинда атиги бир очко жамғарган ҳолда Чемпионлар лигаси гуруҳ босқичида охирги ўринда бормоқда. Лондон клуби Премьер-лигада 7-турдан кейин 13 очко билан бешинчи ўринни эгаллаб турибди. “Челси” хўжайини Тодд Боули эса ҳозирги вазиятдан норози ва клубни янада кучайтириш учун сармоя киритмоқчи. Бу жараёнда хато қилмаслик жуда муҳимдир.
Поттер “Интер”дан Лукакуни қайтариш ниятида
Боули Поттернинг трансфер масалалари бўйича фикрини тинглади. “Челси” бош мураббийи эса “Интер”да ижара асосида ўйнаётган ҳужумчи Ромелу Лукакунинг Лондонга қайтишига қарши эмас. “ESPN” нашрининг хабарига кўра, мавсум охирида Поттер Лукаку билан “Челси”даги келажаги ҳақида гаплашади.
Ромелу ўтган мавсумда Премьер-лиганинг 26 ўйинида 8 та гол урди. “Челси” ҳужумчига 2021 йилги мавсум оралиғида “Интер”га 115 миллион евро тўлаганди.
“Интер”га қайтган 29 ёшли бельгиялик футболчи А Cериянинг учта ўйинида битта гол урди ва голли узатмани амалга оширди. Футболчи жароҳати туфайли 26 августдан бери майдонга тушмаяпти. Эҳтимол, ҳужумчи тикланганидан кейин ўз ўйинини топиб олар, аммо бу фақат назарий фикр. Лукакунинг муваффақиятсиз ўйин эҳтимоли кам эмас.
Ҳар ҳолда, “Челси” келаси ёзда Лукакунинг келажагини ҳал қилиши керак. “La Gazzetta dello Sport” нашрининг хабар беришича, Ромелу Италия клубида доимий қолишни истамоқда. Унга шартномада сотиб олиш варианти ёки “Интер”нинг мажбурияти йўқлиги ёқмаяпти.
Поттер Лукаку билан гаплашиб, унинг “Челси”даги истиқболларини муҳокама қилмоқчи. Айни дамда мураббий футболчининг қайтиши ҳақида жиддий ўйламоқда. Ўтмишда Ромелу “Интер” ҳужумчиси Лаутаро Мартинес билан тандемда муваффақиятли ўйнаган. Поттерга 3-5-2 схемаси ёқади, шунинг учун у бунга Лукаку мос деб билади.
Ромелунинг Италияда қолиш истаги иккинчи даражали бўлиши мумкин. “Интер” жиддий молиявий муаммоларни бошдан кечирмоқда ва бельгиялик футболчининг трансфери бўйича сўровларни қондира олмайди. Ромелунинг “Челси” билан шартномаси 2026 йилгача амал қилади.
Бироқ, айни дамда “Челси” Нкунку билан шартнома борасида келишиб олди. 24 ёшли Кристофер Нкунку билан 2028 йилгача шартнома имзоланди. Бу ҳақда инсайдерлар Фабрицио Романо ва Николо Шира хабар беришди. Катта эҳтимол билан лондонликлар ҳужумчи шартномасида кўрсатилган 60 миллион евро тўлашлари керак бўлади.
Нкункудан ташқари таркибда яна Раҳим Стерлинг, Кристиан Пулишич, Армандо Броя ва Пер-Эмерик Обамеянг бор. Лукаку эса бу ҳужум чизиғи учун ортиқча бўлиши мумкин. “Челси” бельгиялик футболчининг Лондонга қайтиши бўйича катта хатога йўл қўймоқда. Агар, бельгиялик футболчи жамоага қайтадиган бўлса, унинг трансфери омадсиз якунланиши шубҳасиз.
“Маrcа” нашрининг хабарига кўра, лондонликлар Килиан Мбаппе “ПСЖ”дан кетишга қарор қилса, унинг учун ҳам курашга қўшилиши мумкин. Воқеаларнинг бундай бурилиш эҳтимоли бироз ишонсизроқ туйилмоқда.
ОАВда эса Килианни “ПСЖ” 2023 йилги мавсум оралиғида сотиш вариантини кўриб чиқаётгани ва ҳужумчининг ўзи ҳам кетишни ўйлаётгани ҳақида бир нечта маълумотлар пайдо бўлган.
Агар Мбаппе трансферга қўйилса, “Челси” жиддий рақобат остида қолиши табиий. Ромелу Лукакуга эса ҳозирги “Челси”да ўрин йўқ. Шу билан бирга бельгиялик футболчининг шартномасида бир қанча муаммоли масалалар мавжуд.
Лондонликлар учун энг яхши вариант нима? “Football Italia” хабарига кўра, “Интер” фақат Лукакунинг ижарасини узайтиришга тайёр, чунки уларни сотиб олишга пули йўқ. Бу барча учун энг тўғри ечим бўлиши мумкин.
