“Барселона” кейинги босқичда ўйнашга лойиқ эмас — Хави
Мураббий “Интер”га қарши ўйин ҳақида гапирди.
“Барселона” бош мураббийи Хави Чемпионлар лигаси гуруҳ босқичи 4-турида “Интер”га қарши ўйин (3:3) натижаси ҳақида гапирди.
“Биринчи бўлим ажойиб ўтди, биз яхши ҳужум қилдик. Педри ва Гавининг ярим ҳимоядаги ажойиб ўйини ҳисобига “Интер”га кучли босим уюштирдик. Иккинчи бўлимда жуда кўп хатоларга йўл қўйдик. Чемпионлар лигасида хатолар қимматга тушади. Биз характер кўрсатишга ҳаракат қилдик. Лекин ўз уйингизда “Интер”ни мағлуб эта олмасангиз, Чемпионлар лигасининг кейинги босқичларида ўйнашга лойиқ эмассиз. Умид кам, бу хатолардан хулоса чиқариш лозим. Мен мураббийман ва футболчиларим хатога йўл қўйса, жавобгарликни ўз бўйнимга олишим керак”, — дея Хавининг сўзларидан “Football Italia” нашри иқтибос келтирди.
Эслатиб ўтамиз, тўрт турдан кейин “Барселона” тўрт очко билан турнир жадвалида учинчи ўринда бормоқда. “Интер” эса 7 очко билан иккинчи ўринни эгаллаб турибди. Турнир жадвалини “Бавария” 12 очко билан бошқариб турибди.
