Франция терма жамоаси учун жиддий йўқотиш
Н’Голо Канте ЖЧ-2022ни ўтказиб юбориши мумкин.
“Челси” ярим ҳимоячиси Н'Голо Кантенинг аввалги жароҳати яна такрорланди. Бу ҳақда “Lequipe” нашри хабар берди.
Манбага кўра, ўтган ҳафтада тиззасидан олган жароҳати сабаб, Н'Голо Канте яна бир неча ҳафта майдонга тушмаслиги мумкин. Шу тариқа футболчида кейинги ой Қатарда бўлиб ўтадиган футбол бўйича жаҳон чемпионатини ўтказиб юбориш хавфи бор.
Маълумот учун: Франция терма жамоаси бош мураббийи Диде Дешам 9 ноябрь куни ЖЧ-2022 учун қайдномасини тақдим қилиши керак. Канте охирги марта 14 август куни майдонга тушганди.
Аввалроқ ОАВда “Челси” Н'Голо Канте билан шартномани узайтирмоқчи эмаслиги ҳақида хабарлар тарқалган эди. Лондон клубининг маълум қилишича бунга футболчининг доимий жароҳатлари сабаб бўлмоқда. Канте 2022/2023 йилги мавсумда бор йўғи иккита ўйин ўтказган.
