Кутилмаган учрашув
Роналдунинг агенти “Барселона” раҳбарияти билан музокара ўтказди.
“Манчестер Юнайтед”нинг португалиялик ҳужумчиси Криштиану Роналду “Барселона”га ўтиши мумкин. Бу ҳақда “The Sun” нашри хабар берди.
Манбага кўра, футболчининг вакили Хорхе Мендес Манчестердаги ресторанлардан бирида “Барселона” раҳбарияти билан учрашган. Бироқ, Мендес “Манчестер Сити” футболчиси Бернарду Силванинг агенти ҳам ҳисобланади ва учрашувда “шаҳарликлар” футболчисини ўтказиш бўйича музокаралар олиб борилиши мумкин эди.
Роналду ёзда “қизил иблислар”ни тарк этмоқчи эди. Форварднинг агенти футболчи учун вариантларни қидирмоқда. Аввалроқ, Лондоннинг “Челси” клуби ва “Бавария” португалиялик ҳужумчига даъвогар сифатида кўрилаётган эди. Шунингдек, футболчига МЛСдан Девид Бекхемнинг “Интер Маями” клуби қизиқаётгани ҳақида ҳам маълумотлар бор эди.
Жорий мавсумда Роналду АПЛда 7 та ўйинда майдонга тушиб, битта гол урди.
