Лапорта “Эль-класико”да “Барса”нинг имкониятини юқори баҳолади
У “Реал” ҳам охиригача курашишини таъкидлаган.
“Барселона” президенти Жоан Лапорта Испания Примерасининг 9-туридан ўрин олган “Реал”га қарши бўлиб ўтадиган ўйин ҳақидаги фикрлари билан ўртоқлашар экан, унинг мусобақадаги етакчилик ва жамоанинг руҳий ҳолати борасидаги аҳамиятини баҳолади.
“Барселона” ва “Реал” учрашувлари ҳар доим жуда қизиқарли бўлади. Чунки, бундай ўйинда ғалаба қозонган жамоа янада кучлироқ бўлади. Ютқазган эса, шунга кўра, маънавий зарба олади, бу унга зарар етказади. Агар натижага эришиб, жадвалда пешқадамлик қилишда давом этсак, бу бизни янада кучли қилади. Бизда энг яхши ўйин тизими мавжуд. “Реал Мадрид” ҳамиша охиригача курашади, буни тан олиш керак. Умид қиламизки, бу ўйинда ҳам ўтган мавсумдагидек ҳаммаси яхши бўлади”, — дея Лапортанинг сўзларидан “Маrcа” нашри иқтибос келтирди.
Эслатиб ўтамиз, “Реал Мадрид” — “Барселона” учрашуви 16 октябрь куни “Сантяго Бернабеу” стадионида бўлиб ўтади. Ўтган мавсумда “кўк-анорранглилар” Мадридда 4:0 ҳисобида ғалаба қозонишган.
