“Биз Неймарга ўн йил олдин қизиқиб қолгандик”
Перес Неймар нима сабабдан “Барса”ни танлаганини айтди.
“Реал Мадрид” президенти Флорентино Перес Франциянинг “ПСЖ” клубида тўп сураётган 30 ёшли бразилиялик ҳужумчи Неймарга “Сантос”да ўйнаб юрган пайтларида қизиқиш билдирганини эслади.
“Биз Неймарга 10 йил олдин қизиқиб қолгандик. Спорт директоридан у “Сантос”дан кетмоқчи эканлигини билдим. “Реал” футболчи учун 45 миллион евро таклиф қилди. Нега у “Реал Мадрид”га ўтмади? Биласизки, ўйинчилар хоҳлаган жойга боришади. Неймар “Барселона”га ўтишни хоҳлаган ва шунинг учун ҳам каталонияликлар сафига бориб қўшилди”, — дея Переснинг сўзларидан “Маrcа” нашри иқтибос келтирди.
Эслатиб ўтамиз, 2013 йилнинг ёзида Неймарнинг трансфери “Барселона”га 88 миллион еврога тушган эди. У жамоа таркибида барча мусобақаларда 186 та ўйин ўтказиб, 105 та гол урган ва 76 та голли узатмани амалга оширган. 2017 йилнинг августида бразилиялик футболчи “ПСЖ”га 222 миллион евро эвазига ўтган эди.
