Илкай Гюндоганга “Бавария” қизиқмоқда
Футболчи жаҳон чемпионатидан сўнг бир қарорга келмоқчи.
“Манчестер Сити” ярим ҳимоячиси Илкай Гюндоган фаолиятини Германияда давом эттириши мумкин. Бу ҳақда журналист Грем Бейли ижтимоий тармоқдаги саҳифасида маълум қилди.
Манбага кўра, 32 ёшли германиялик футболчининг хизматларига “Бавария” қизиқиш билдирмоқда. Гюндоганнинг “Манчестер Сити” билан амалдаги шартномаси 2023 йилнинг ёзига қадар тузилган. Футболчи Қатардаги жаҳон чемпионати якунланганидан сўнг бир қарорга келади. Аввалроқ Гюндоган хизматларига “Барселона” ва “Ювентус” клублари қизиқиш билдираётгани ҳақида хабарлар тарқалган эди.
Эслатиб ўтамиз, Гюндоган жорий мавсумда Премьер-лигада 9 та ўйинда майдонга тушиб, 2 та гол урди ва битта голли узатмани амалга оширди.
