Ўрунов “Навбаҳор”га ўтишга яқин турибди
У Ўзбекистонда мавсум тугашини кутмоқда.
“Спартак” ва “Урал” клубининг собиқ футболчиси Остон Ўрунов Ўзбекистонга қайтишга яқин турибди. Ярим ҳимоячининг хизматларига “Навбаҳор” клуби қизиқиш билдирмоқда. Бу ҳақда “Метаратингс” нашри хабар берди.
Манба берган хабарга кўра, Ўрунов яқин кунларда “Навбаҳор”га ўтиш бўйича якуний қарорни қабул қилади. Агар “Навбаҳор” ОЧЛ йўлланмасини қўлга киритса, Ўрунов клуб таклифига рози бўлади. Шунинг учун Остон Ўзбекистонда мавсум якунланишини кутмоқда.
Қайд этилишича, Остон Кореянинг “Жонбук Моторс” клубига ҳам ўтиши мумкин эди, бироқ клуб эътиборини бошқа футболчига қаратган.
Айни дамда “Навбаҳор” Ўзбекистон чемпионатида учинчи ўринни эгаллаб турибди. Турнирда биринчи ва иккинчи ўринни эгаллаган жамоалар тўғридан-тўғри Осиё чемпионлар лигасига йўлланма олади. 3 ва 4-жамоалар эса саралаш орқали Чемпионлар лигасига чиқади.
Эслатиб ўтамиз, Остон Ўрунов “Пахтакор” клуби тарбияланувчиси ҳисобланади. Россияда у “Спартак”, “Уфа” ва “Урал” клубларида ўйнаган.
