Тарихга кирган хатолар: севимли таомларимиз қандай пайдо бўлган?

 

Тарихда ошпазларнинг хатолари сабаб тасодифан пайдо бўлган таомлар жуда кўп. Замонавий ошпазларнинг бахтига интернетда деярли барча таомнинг тайёрланиш усули ёзилган. Аммо бугун биз учун оддий бўлган нарсалар кутилмаганда кашф қилинган. 

 

Мевали музқаймоқ

 

Бу музлатилган ширинликни 11 ёшли Фрэнк Эпперсон ўйлаб топган. У ўзи учун ширин газли сув тайёрлашни ёқтирган. Аммо бир кун у ичида чўп қолиб кетган идишни ҳовлида  унутиб қолдиради, идишдаги маҳсулот эса тунда музлаб қолади. Тонгда болакай уни эритиб ичишнинг ўрнига шу ҳолатича еб қўяди. Мевали музқаймоқнинг биринчи харидорлари болакайнинг қўшнилари ва ўртоқлари бўлади. Тез орада ширинлик дунё бўйлаб машҳур бўлди. 

 

Шоколад қириндисили печенье

 

1930 йилда америкалик Рут Уэйкфилд катта оила учун печенье тайёрлаётганида уйида какао қолмаганини кўради. У какаонинг ўрнига шоколад бўлакларидан фойдаланишга қарор қилади. У шоколаднинг печда эришини кутган эди. Аммо натижада ҳозиргача машҳур бўлган янги печенье тури пайдо бўлди. 

 

Конусли музқаймоқ

 

Стаканли музқаймоқ қандай пайдо бўлгани ҳақида ҳеч ким ўйлаб ҳам кўрмаган бўлса керак. Аммо у ҳам 1904 йил ёзида тасодифан ўйлаб топилган. Ўшанда музқаймоқ сотувчисининг пластик стаканлари тугаб қолган ва у ёнгинасидаги кондитерлик дўконидан вафлили стакан тайёрлаб беришни сўради. Дўкон унга вафли пластинкаларини таклиф қилган, музқаймоқчи эса бу пластинкаларни конус шаклига келтириб, ичига музқаймоқ солди. 

 

Чипслар 

 

Миллионлар севган “снэк” 1853 йилда Moon’s Lake House ресторанида пайдо бўлган. Бир куни ресторан мижозларидан бири қовурилган картошканинг қалинлигидан шикоят қилган. Шунда  бош ошпаз картошкани максимал юпқа қилиб кесиб, туз ва зираворлар билан қовурган. Мижоз бу таомдан лол қолган.