Президент ички ишлар органлари ходимларига табрик йўллади

Ўзбекистон Президенти Шавкат Мирзиёев Ички ишлар вазирлиги ташкил этилганининг 35 йиллиги муносабати билан тизим ходимларини табриклади. Давлат раҳбари табригида жамоат хавфсизлигини таъминлаш, жиноятчиликнинг олдини олиш ва фуқароларнинг ҳуқуқларини ҳимоя қилиш масалаларига эътибор қаратди.

 

Президентнинг таъкидлашича, жорий йилда Ўзбекистон маҳаллаларининг қарийб ярмида жиноят содир этилмаган. Бу натижа ички ишлар органлари ходимлари, маҳалла фаоллари ва аҳолининг ҳамкорликдаги меҳнати самараси сифатида қайд этилган.

 

Шавкат Мирзиёев ҳар бир маҳаллада хавфсиз муҳит яратиш бўйича ишларни изчил давом эттириш зарурлигини таъкидлади. Шунингдек, жамоат хавфсизлигини таъминлашда рақамли технологиялар ва сунъий интеллект имкониятларидан фойдаланишни кенгайтириш, кибержиноятларни барвақт аниқлаш ва уларнинг олдини олиш муҳим вазифалар эканини билдирди.

 

Давлат раҳбари гиёҳвандлик ва уюшган жиноятчиликка қарши курашиш, ёшларни бу иллатлардан ҳимоя қилиш ҳамда ички ишлар органлари учун малакали кадрлар тайёрлаш масалаларига ҳам тўхталди. Бу борада назарий билимларни амалиёт билан уйғунлаштириш, дуал таълимни ривожлантириш ва маҳаллий ҳамда хорижий мутахассислар тажрибасидан фойдаланиш зарурлиги қайд этилди.

 

Президент ички ишлар органлари ходимларидан жиноятларнинг олдини олишда ташаббускорлик, хизматда интизом ва ҳалолликни кутаётганини таъкидлади. Фуқаролар билан мулоқотда уларни диққат билан тинглаш, муаммоларини қонуний ҳал этишга кўмаклашиш тизимга бўлган ишончни мустаҳкамлаши қайд этилди.

 

Шунингдек, табрикда хизмат вазифасини бажариш чоғида ҳалок бўлган ходимлар хотирасини эъзозлаш, уларнинг оилалари ва фарзандларига ғамхўрлик кўрсатиш муҳимлиги таъкидланди. Тизим фахрийларига ҳам алоҳида эҳтиром билдирилди.

 

Шавкат Мирзиёев ички ишлар органлари ходимларига мустаҳкам соғлиқ, оилаларига тинчлик ва фаровонлик, хизмат фаолиятида муваффақиятлар тилади.