Россия Украинага ҳужум қилди: қурбонлар бор
Ҳужумлар оқибатида Киев ва Харьковда тинч аҳоли вакиллари жароҳатланди.
Россия қўшинлари 24 октябрга ўтар кечаси Украинага 126 та ҳаво ҳужуми воситаси билан ҳужум қилди. Украина ҳарбийлари 101 та дронни уриб туширган ёки электрон воситалар ёрдамида зарарсизлантирган. Ҳужумлар оқибатида Киев ва Харьковда тинч аҳоли вакиллари жароҳатланган.
Украина Қуролли кучлари Ҳарбий-ҳаво кучлари маълумотига кўра, ҳужумларда «Геран» ва Shahed русумидаги зарба берувчи дронлар, жумладан, реактив аппаратлар, «Бандероль» русумидаги айланиб учувчи ўқ-дорилар ҳамда «Пародия» русумидаги тақлидчи дронлар қўлланган.
Учувчисиз аппаратлар Россиянинг Шаталово, Орёл, Курск, Брянск ва Приморско-Ахтарск ҳудудларидан, шунингдек, Россия назоратидаги Донецк ва аннексия қилинган Қримдаги Гвардейское ҳудудидан учирилган.
Украина ҳарбий-ҳаво кучлари маълумотида душман ҳужуми воситаларининг 14 та нуқтага келиб урилгани, уриб туширилган аппаратлар қолдиқлари эса бешта нуқтага тушгани қайд этилган. Ҳужумлар ҳисобот эълон қилинганидан кейин ҳам давом этган.
Киев шаҳар ҳарбий маъмурияти хабарига кўра, пойтахтнинг Оболон туманида дрон ҳужуми оқибатида хусусий уй шикастланган, икки киши жароҳатланган. Шунингдек, Россиянинг навбатдаги ҳужумларидан кейин шаҳарнинг Голосеев ва Соломенка туманларидаги айрим ҳудудларда фавқулодда электр узилишлари жорий этилган.
Харьков вилояти ҳарбий маъмурияти раҳбари Олег Синегубовнинг билдиришича, 24 октябрь куни эрталаб дрон Харьковнинг Индустриал туманига зарба берган. Оқибатда 64 ёшли аёл жароҳатланган. Ҳужумнинг бошқа оқибатлари аниқлаштирилмоқда.
Донецк вилояти ҳарбий маъмурияти раҳбари Вадим Филашкиннинг маълум қилишича, ўтган сутка давомида Россия армиясининг зарбалари оқибатида Славянск ва Краматорск шаҳарларида икки нафар тинч аҳоли вакили ҳалок бўлган, яна 18 киши жароҳатланган.
