Польшага қулаган ракета Украинага тегишли экани айтилмоқда
НАТО давлатлари ҳолат юзасидан батафсил текширув зарурлигини айтди.
АҚШ расмийларининг дастлабки маълумотларига кўра, сешанба куни Польша шарқида қулаган ракета Украина қуролли кучлари томонидан учирилган. Бу ҳақда АҚШ маъмурияти вакилларига таяниб, Associated Press ахборот агентлиги маълум қилди.
Агентлик маълумотларига кўра, Украина ракетаси Россия ракетасини уриб тушириш учун учирилган.
Аввалроқ Польшанинг Украина билан чегарасидаги Пржеводув қишлоғи ҳудудига келиб чиқиши номаълум ракета қулагани, натижада икки киши ҳалок бўлгани хабар қилинганди.
Шундан сўнг, расмий Варшава мамлакатдаги айрим ҳарбий қисмларнинг жанговар тайёргарлигини оширишга қарор қилди.
НАТОнинг кўплаб давлатлари воқеа юзасидан хавотир билдирди, шунингдек, батафсил текширув зарурлиги қайд этилган.
Аввалроқ АҚШ разведкаси ракеталар Москва томонидан Украинада учирилган, бироқ Польша ҳудудига тушган, деб хабар тарқатган эди. Пентагон эса бу маълумотни тасдиқламади.
Россия Мудофаа вазирлиги Польша оммавий ахборот воситалари ва расмийларининг баёнотларини вазиятни кескинлаштириш мақсадида “қасддан қилинган провокация” деб атади.
